بحرین میں ڈیجیٹل سروسز متاثر، شاہ فہد پل پر گاڑیوں کی لمبی قطاریں

بحرینی ڈیجیٹل گورنمنٹ کا کہنا ہے کہ مختلف نوعیت کی ڈیجیٹل سروسز میں پیدا ہونے والا تعطل عارضی ہے جو اپ گریڈیشن کی وجہ سے ہوا۔

سبق نیوز  کے مطابق بحرین میں ڈیجیٹل سروسز کی اپ گریڈیشن اور مینٹیننس کی وجہ  سے مملکت اور بحرین کے مابین شاہ فہد پل پر امیگریشن خدمات کسی حد تک متاثر ہوئیں جس کی وجہ سے سرحدی چوکی پر گاڑیوں کی لمبی قطاریں لگ گئیں۔

بحرینی ڈیجیٹل اتھارٹی کا کہنا ہے کہ سسٹم کو جلد ہی اپ ڈیٹ کرنے کے بعد مکمل طور پر بحال کردیا جائے گا۔ سسٹم کو اپ گریڈ کرنے کا مقصد فراہم کی جانے والی خدمات کے معیار کو مزید بہتر بنانا ہے۔

واضح رہے  ہفتہ وار تعطیل کے موقع پر سعودی عرب اور بحرین کے مابین بڑی تعداد میں مسافروں کی آمد ورفت ہوتی ہے۔ سسٹم میں ہونے والے تعطل کی وجہ سے پل پر گاڑیوں کی لمبی قطاریں لگ گئیں جس کی وجہ سے مسافروں کو کافی دیر انتظار کرنا پڑا۔