مدینہ منورہ اور مکہ مکرمہ میں انتقال کرنے والے حجاج کی تعداد 173 ہوگئی
مکہ مکرمہ(محمد عامل عثمانی) ہندوستان حج مشن کے ترجمان یونس اعظمی کے مطابق جمعہ کو 16 فلائٹس کے ذریعہ 4484 حجاج واپس روانہ ہوگئے ۔ اس طرح مجموعی طور پر 128 فلائٹس کے ذریعے 35645 حجاج وطن پہنچ چکے ہیں۔ حج مشن کے مطابق مکہ مکرمہ اور مدینہ منورہ میں 173 حجاج انتقال کرچکے ہیں۔ اس وقت مکہ مکرمہ میں 72077 ہندوستانی حجاج اور مدینہ منورہ میں 17081 موجود ہیں۔ نیز انہوں نے یہ بھی کہا کہ انتظامی امور پر نظر رکھنے کیلئے قونصل جنرل ہند محمد نورالرحمن شیخ اور قونصل جنرل حج مشن ہند محمد شاہد عالم حجاج کرام کی رہائش گاہوں اور مواصلاتی نظام کو مانیٹرنگ کرنے کیلئے موجود رہتے ہیں۔
