میڈرڈ۔۔۔اسپین کی حکومت نے آزادی کا اعلان کرنیوالے نیم خودمختار علاقے کاتالونیا کی حکومت کو برطرف اور پارلیمنٹ کو تحلیل کردیا۔اسپین کے وزیر اعظم ماریانو راجاؤ نے کاتالونیا کی علاقائی پارلیمنٹ کی جانب سے آزادی کے اعلان کے کچھ ہی دیر بعد وہاں کی حکومت کو برطرف اور پارلیمنٹ کو تحلیل کردیا جبکہ 21 دسمبر کو قبل از وقت انتخابات کرانے کا اعلان کیا ہے۔جرمنی، امریکہ، فرانس اور برطانیہ نے ا سپین کی مرکزی حکومت کے اس اقدام کی پرزور حمایت کرتے ہوئے کاتالونیا کی آزادی کی مخالفت کی ہے۔ وزیر اعظم ماریانو راجاؤ نے کہا کہ کسی کو یہ حق نہیں کہ وہ قانون سے بالاتر ہوکر فیصلہ کرے، حالات کو معمول پر لانے کیلئے کاتالونیا پر براہ راست وفاق کا اقتدار نافذ کرنا ضروری ہے۔ ہسپانوی وزیراعظم نے کاتالونیا حکومت کے سربراہ کارلیس پوگیمونٹ اور ان کی کابینہ کو فارغ کرتے ہوئے پولیس کے ڈائریکٹر جنرل کو بھی معطل کر دیا۔ وزیر اعظم ماریانو راجاؤ نے کہا کہ کاتالونیا کے لوگوں نے اپنے مستقبل کا فیصلہ کیا تھا لیکن کسی کو یہ حق حاصل نہیں کہ وہ قانون سے بالاتر ہو کر اپنے مطابق فیصلہ کرے۔واضح رہے کہ چند روز قبل کاتالونیا کی پارلیمنٹ نے رائے شماری کے بعد اسپین سے آزادی کا اعلان کر دیا تھا اور علیحدگی کے حق میں 70 جبکہ مخالفت میں 10 ووٹ ڈالے گئے جبکہ رواں ماہ کے اوائل میں کاتالونیا میں ریفرنڈم ہوا تھا جس میں 90 فیصد عوام نے آزادی کے حق میں ووٹ دیا تاہم اسپین کی مرکزی حکومت اور سپریم کورٹ نے اس ریفرنڈم کو غیر قانونی قرار دیا تھا۔
