زائرین اور معتمرین کی سہولت کیلئے اہم مقامات پر اسمارٹ بورڈز کی تنصیب
ریاض - - - - وزارت اسلامی امور و دعوۃ والارشاد نے معتمرین اور زائرین کی سہولت کیلئے ہوائی اڈوں اور بعض مساجد میں 50 زبانوں پرمشتمل معلوماتی ڈیجیٹل بورڈنصب کر نے کا آغاز کر دیا ۔ سعودی خبر رساں ایجنسی کے مطابق وزرات اسلامی امور کی جانب سے نصب کی جانے والی "ڈیجیٹل بک " میں حج و عمرے کا طریقہ ، زیارت کے آداب ، اسلام کے بارے میں اہم معلومات اور زائرین حرمین شریفین کیلئے اہم ہدایات کے علاوہ 3 ہزار کے قریب اہم معلومات مہیا کی گی ہیں ۔ ای بک کے ذریعے کوئی بھی شخص مطلوبہ معلومات اپنے انڈرائیڈ فون پر منتقل کر سکتا ہے جو اسکے لئے کافی مفید ہو نگی ۔ اسمارٹ اسکرینوں کو اہم ہوائی اڈوں جن میں جدہ کاشاہ عبدالعزیز بین الاقوامی ہوائی اڈہ ، مدینہ منورہ میں شہزادہ محمدبن عبدالعزیز انٹرنیشنل ائیر پورٹ ، ینبع ائیر پورٹ، طائف انٹرنیشنل ائیر پورٹ ، طائف سے مکہ مکرمہ آنے والی میقیات ، وادی محرم ، مدینہ منورہ کی میقات ذی الحلیفہ ، مسجد عائشہ اور مسجد قباء میں نصب کیا گیا ہے ۔ اس ضمن میں وزرات کے ذمہ دار کا کہنا ہے کہ اسمارٹ اسکرین مزید مقامات پر بھی نصب کی جائیں گی تاکہ بڑی تعداد میں لوگ اس سے مستفیض ہو سکیں۔
