عامر خان 21 اپریل کو کینیڈین باکسر سے مقابلہ کرینگے
لندن:پاکستان نژاد برطانوی باکسر عامر خان 2سال بعد رنگ میں اترنے کو تیارہیں، وہ نئے ٹرینر کےساتھ بھرپور پریکٹس کر رہے ہیں،برطانوی کاونٹی مرسی سائیڈ میں عامر خان 21 اپریل کو ویلٹر ویٹ کیٹیگری مقابلے میں کینیڈین باکسر فل لوگریکو کے مدمقابل ہوں گے،جس کےلئے انہوں نے بھرپور پریکٹس کا آغاز کردیا،عامر خان کے نئے امریکی کوچ جوئے گوسین انہیں تربیت دے رہے ہیں جبکہ اس سے قبل وہ امریکی ٹرینر ورجل ہنٹر سے تربیت لے رہے تھے جن کی ناساز طبیعت کے باعث باکسر عامر خان کو ٹرینر تبدیل کرنا پڑا۔ 21 اپریل کو ہونےوالی فائٹ سے متعلق عامر خان نے کہا کہ نئے کوچ انہیں دوبارہ ٹریک پر لانے کےلئے بھرپور مدد کر رہے ہیں اور امید ہے کینیڈین باکسر کےخلاف بہتر فائٹ کرونگا،سابق کوچ ورجل ہنٹر کی طبیعت خراب ہونے پر افسردہ ہوں تاہم اس بات پر خوش ہوں کہ جوئے گوسین میری مدد کو آئے اور تربیت دے رہے ہیں۔ لیورپول کے ایکو آرینا میں ہونےوالے اس مقابلے میں عامر خان کو ہوم گراونڈ کا فائدہ ہوگا جہاں شائقین ان کی فائٹ دیکھنے کےلئے بےتاب ہیں۔ عامر خان آخری مرتبہ مئی 2016 میں میکسیکو کے باکسر کنیلو الویراز کے مدمقابل آئے تھے اور اس مقابلے میں انہیں شکست ہوئی تھی۔باکسر عامر خان اپنے کیرئیر میں اب تک 35 فائٹس کرچکے ہیں جن میں سے 31 میں کامیابی اور 4 میں شکست کا سامنا کرنا پڑا۔
