اسلام آباد: فیصل رضا عابدی کو توہین عدالت کے کیس میں گرفتار کرلیا گیا ہے۔ ذرائع کے مطابق پیپلز پارٹی کے سابق سینیٹر فیصل رضا عابدی کو سپریم کورٹ کے باہر سے حراست میں لے کر تھانہ سیکرٹریٹ میں منتقل کردیا گیا۔قبل ازیں فیصل رضا عابدی توہین عدالت کے کیس میں عدالت عظمیٰ میں پیش ہوئے۔ جہاں جسٹس شیخ عظمت سعید کی زیر سربراہی بینچ نے فیصل رضا عابدی کے خلاف کیس کی سماعت کی۔ فیصل رضا عابدی کے خلاف گزشتہ شب تھانہ سیکرٹریٹ میں نئی ایف آئی آر درج کی گئی ہے جس میں ان پر اعلیٰ عدلیہ کے خلاف توہین آمیز بیانات دینے کا الزام ہے ۔پیشی سے قبل میڈیا سے گفتگو کرتے ہوئے فیصل رضا عابدی نے کہا کہ عدالت پر اعتماد کرتا ہوں تاہم پی سی او ججز پر ہمیشہ اعتراض رہا ہے۔ کیس پر بات کرنے کا فائدہ نہیں کیونکہ میڈیا نے چلانا نہیں۔ جسٹس تصدق جیلانی اور جمالی پر کبھی اعتراض نہیں کیا۔واضح رہے کہ فیصل رضاعابدی کے خلاف سپریم کورٹ کے جج صاحبان کی توہین کرنے اور دھمکیاں دینے کے الزام میں پہلے ہی 2 مقدمات درج ہیں۔
