پاکستان ہاکی ٹیم: ریحان بٹ اور دانش کلیم مستعفی

لاہور: ہند کے شہر بھوبنیشور میں کھیلے گئے 14ویں ہاکی ورلڈکپ میں پاکستان ہاکی ٹیم کی شرمناک پرفارمنس کے بعد استعفوں کا سلسلہ جاری ہے۔قومی ہاکی ٹیم کے معاون کوچز ریحان بٹ اور دانش کلیم نے بھی مستعفی ہونے کا اعلان کردیا ہے۔ قبل ازیںٹیم منیجر حسن سردار اورچیف کوچ توقیر ڈار بھی استعفے دے چکے ہیںریحان بٹ کا کہنا ہے کہ محدود وسائل میں جتنا ممکن ہوسکا، ٹیم کی کارکردگی میں بہتری لانے کیلئے کام کرنے کی کوشش کی۔ ورلڈکپ میں ٹیم سے بہت اچھی کارکردگی کی امید تھی لیکن نتائج اچھے نہیں آئے، میرے نزدیک ہاکی کے پورے نظام کی اوور ہالنگ کی ضرورت ہے۔ مستقبل کیلئے نوجوان کھلاڑیوں پر توجہ دینا ہوگی۔دانش کلیم کا کہنا ہے کہ ورلڈ کپ سے پہلے توقیر ڈار کے کہنے پر یہ اہم ذمہ داری قبول کی تھی، اب ایونٹ ختم ہونے پر میرا تعلق بھی ختم ہوگیا ہے۔ پاکستان ہاکی فیڈریشن مستقبل میں کام لینا چاہے تو خدمات حاضر ہیں، نئی انتظامیہ کیلئے نیک تمنائیں ہیں، اس سے پہلے ٹیم منیجر حسن سردار اور چیف کوچ توقیر ڈار بھی استعفے دے چکے ہیں۔ ریحان بٹ اور دانش کلیم کے مستعفی ہونے سے پوری ٹیم انتظامیہ مستعفی ہوگئی ہے۔

 کھیلوں کی مزید خبریں اور تجزیئے پڑھنے کیلئے واٹس ایپ گروپ"اردو نیوزاسپورٹس"جوائن کریں