صدر ٹرمپ سے سعودی قیادت کا اظہار تعزیت و ہمدردی

ریاض ۔۔۔ خادم حرمین شریفین شاہ سلمان بن عبدالعزیز نے امریکی ریاست الابامہ میں طوفان سے ہونے والے جانی نقصان پر امریکی صدر ڈونلڈ ٹرمپ سے تعزیت و ہمدرد ی کا اظہار کردیا۔ شاہ سلمان نے امریکی صدر کے نام پیغام میں تحریر کیا کہ ہمیں امریکی ریاست الابامہ میں آنے والے طوفان اور اس سے ہونے والی اموات اور جانی نقصانات کی اطلاعات سن کر افسوس ہوا۔ ہم آزمائش کی اس گھڑی میں امریکہ اور دوست عوام کے ساتھ ہیں۔ دکھ میں برابر کے شریک ہیں۔ جاں بحق ہونے والوں کے اعزہ ، دوست امریکی عوام اور آپ سے سعودی عوام و حکومت اور خود اپنی جانب سے تعزیت و ہمدردی رکھتے ہیں۔ ہماری دعا ہے کہ اللہ تعالیٰ زخمیوں کو فوری شفا سے نوازے۔ سعودی ولی عہد شہزادہ محمد بن سلمان نے بھی صدر ٹرمپ کے نام اسی مضمون کا مکتوب ارسال کیا ہے۔