مدینہ منورہ میں زلزلے کے جھٹکے

مدینہ منورہ کے شمال مغرب میں آج صبح زلزلے کے جھٹکے ریکارڈ کیے گئے تاہم ان کی شدت بہت کم تھی۔

سبق ویب سائٹ کے مطابق زلزلے کے جھٹکے پیر کی صبح 11 بجکر 35 منٹ پر ریکارڈ کیے گئے جن کی شدت ریکٹرسکیل پر 2.18 پوائنٹ ریکارڈ کی گئی۔

سعودی جیولوجیکل سروے بورڈ کے ترجمان طارق ابا الخیل نے بتایا ہے کہ زلزلے کے جھٹکوں کا مرکز مدینہ منورہ کے شمال مغرب میں 5.4 کلو میٹر زیر زمین تھا۔

انہوں نے کہا ہے کہ ’یہی وجہ ہے کہ زلزلے کے جھٹکوں کی شدت انتہائی کم تھی تاہم مدینہ منورہ کے شمال مغرب کے بعض رہائشیوں نے جھٹکے محسوس کیے۔‘

انہوں نے رہائشیوں کو اطمینان دلایا ہے کہ ’جیولوجیکل سروے حالات کی نگرانی کر رہا ہے۔ اس کے ملک بھر میں 270 سے زیادہ جدید آلات ہر وقت جھٹکوں کا ریکارڈ رکھنے کے لیے کام کر رہے ہیں۔‘