کورونا کے زیرِ علاج مریض صرف 9 ہزار

پاکستان میں کورونا وائرس کا زور کافی حد تک ٹُوٹ چکا ہے اور اب ملک میں وبا کے زیر علاج مریضوں کی تعداد 9 ہزار 31 رہ گئی ہے۔

گذشتہ 24 گھنٹوں کے دوران ملک میں کورونا کے 450 نئے مریضوں کی تشخیص ہوئی ہے۔ اس طرح ملک میں اب تک 2 لاکھ 93 ہزار 711 افراد میں وائرس کی تشخیص ہوچکی ہے۔

منگل کے روز نیشنل کمانڈ اینڈ آپریشن سینٹر کی جانب سے جاری ہونے والے اعداد و شمار کے مطابق ملک میں اب تک کورونا وائرس کے 2 لاکھ 78 ہزار 425 مریض صحت یاب ہو چکے ہیں۔

سرکاری اعداد و شمار کے مطابق گذشتہ 24 گھنٹوں کے دوران کورونا وائرس سے مزید 9 اموات ریکارڈ کی گئی ہیں، اس طرح ملک میں وبا سے ہلاک ہونے والے افراد کی تعداد 6 ہزار 255 ہو گئی ہے۔

ملک میں کورونا کے مریضوں کے لیے مختص ایک ہزار 920 وینٹی لیٹرز میں سے 117 زیر استعمال ہیں جبکہ بلوچستان، پاکستان کے زیرانتظام کشمیر اور گلگت بلتستان میں کوئی مریض وینٹی لیٹر پر نہیں ہے۔

گذشتہ 24 گھنٹوں کے دوران ملک بھر میں 24 ہزار 231 ٹیسٹ کیے گئے ہیں جبکہ مجموعی طور پر 24 لاکھ 87 ہزار 744 ٹیسٹ کیے جا چکے ہیں۔

پاکستان میں کورونا وائرس کے 672 مریضوں کی حالت تشویشناک ہے۔