خاتون صحافی نے پیچھا کر کے فون چھیننے والے پکڑ لیے

انڈین دارالحکومت نئی دہلی میں مبینہ طور پر چوروں نے ایک خاتون صحافی سے موبائل فون چھینا لیکن انہوں نے ان کا پیچھا کیا اور پکڑ کر پولیس کے حوالے کر دیا۔

انڈین نیوز چینل این ڈی ٹی وی کے مطابق دونوں ملزمان پو لیس کی تحویل میں ہیں اور پولیس نے خاتون صحافی کی بہادری کو سراہا ہے۔

پولیس ڈی سی پی آر پی مینا کے مطابق یہ خاتون انڈین ٹی وی دور درشن میں کام کرتی ہیں اور یہ واقعہ سنیچر کی دوپہر اس وقت پیش آیا جب خاتون ایک آٹو رکشہ میں بیٹھ کر اپنے دفتر جا رہی تھیں۔

موٹر سائیکل پر سوار دو آدمیوں نے ان کا موبائل فون چھینا اور بھاگنے کی کوشش کی۔

تاہم خاتون نے رکشے پر ان کا پیچھا کیا اور ایک پولیس بیریئر کے قریب دونوں چور اپنے موٹر سائیکل سے نیچے گر گئے۔

اس خاتون اور رکشہ ڈرائیور نے انہیں قریب ہی ڈیوٹی پر تعینات پولیس اہکاروں کے حوالے کر دیا۔

دونوں ملزمان دہلی میں تغلق آباد کے علاقے کے رہنے والے ہیں اور انہوں نے پولیس کو بتایا کہ وہ نشے کے عادی ہیں اور نشے کی لت پوری کرنے کے لیے اس طرح کے جرائم کرتے ہیں۔