کورونا ایس او پیز پرعمل نہ کرنے پر فیصل مسجد کا اندرونی ہال سیل

‏پاکستان کے دارالحکومت اسلام آباد کی ضلعی انتظامیہ کی جانب سے فیصل مسجد کے اندرونی ہال کو کورونا وائرس کے حوالے سے انتظامات کرنے کے لیے کچھ عرصے کے لیے بند کر دیا گیا ہے۔

اسلام آباد کی ضلعی انتظامیہ کی طرف سے جاری ہونے والے بیان کے مطابق مسجد کے اندرونی ہال میں باجماعت نماز ادا نہیں کی جاسکے گی۔

انتظامیہ کے مطابق گذشتہ نماز جمعہ میں ایس او پیز پر عملدرآمد نہیں گیا جس کے بعد ہال کو بند کر دیا گیا۔ انتظامات کے بعد ہال کو دوبارہ کھول دیا جائے گا۔

ضلعی انتظامیہ کے مطابق ہال کی بندش کے باوجود مسجد کے صحن میں باجماعت نماز معمول کے مطابق جاری رہے گی۔

دوسری جانب نیشنل کمانڈ اینڈ آپریشن سینٹر کی جانب سے اتوار کو جاری اعدا و شمار کے مطابق ملک بھر میں گزشتہ 24 گھنٹوں کے دوران کورونا کے 41 ہزار 645 ٹیسٹ کیے گئے۔

گزشتہ 24 گھنٹنوں کے دوران ملک میں کورونا کے تین ہزار 308 نئے کیسز سامنے آئے ہیں، جب کہ کورونا مثبت ٹیسٹ کی شرخ  7.9 فیصد رہی۔

24 گھنٹوں کے دوران مزید 58 افراد کورونا سے ہلاک ہوگئے، اور اس دوران کورونا  کے دو ہزار 483 مریض صحت یاب بھی ہوئے۔

ملک میں اس وقت کورونا کے ایکٹیو کیسز کی تعداد 53 ہزار 126 ہے۔

پاکستان میں اس وائرس سے متاثرہ افراد کی مجموعی تعداد چار لاکھ 16ہزار 499 ہے جس میں سے تین لاکھ 55 ہزار 12 اب تک صحت یاب ہوئے ہیں جب کہ کل اموات کی تعداد آٹھ ہزار 361 تک پہنچ گئی ہے۔

خیال رہے کہ پاکستان میں اس عالمی وبا کا پہلا کیس 26 فروری 2020 کو رپورٹ ہوا تھا جو جون میں عروج پر پہنچ گئی تھی، تاہم جولائی سے کیسز میں کمی آتی گئی اور ستمبر تک بہتری کا یہ سلسلہ جاری رہا۔

تاہم وبا کی دوسری لہر میں کیسز اور اموات دوبارہ بڑھنا شروع ہو گئی ہیں۔