امارات: کورونا سے مقابلے کے لیے سُونگھنے والے کُتوں کے یونٹس تشکیل

متحدہ عرب امارات کی وزارت داخلہ نے کورونا وائرس کے ممکنہ کیسز کا کھوج لگانے کے لیے پولیس کے سونگھنے والے کتوں کے یونٹس تشکیل دینا شروع کر دیے ہیں۔

متحدہ عرب امارات کی سرکاری نیوز ایجنسی وام کے مطابق یہ یونٹس مخصوص علاقوں اور جگہوں میں تقریبات اور مقابلوں کے دوران کام کریں گے۔

’ان سے منتظمین اور شعبہ صحت کے حکام کو کورونا وائرس کے پھیلاؤ کو روکنے میں مدد ملے گی۔‘

اس حوالے سے قومی اماراتی ٹیم یورپ کے جانوروں کے سب سے پرانے سکول کے ساتھ مل کر کام کر رہی ہے، تاکہ ان سونگھنے والے کتوں کے یونٹس کے لیے تربیتی ورک شاپس کا انعقاد کیا جا سکے۔

یورپ کے جانوروں کے سب سے پرانے اس سکول کا نام نیشنل ویٹرنری سکول آف ایلفورٹ ہے اور یہ فرانس میں واقع ہے۔

گلف نیوز کے مطابق متحدہ عرب امارات ملک میں داخل ہونے والے متعدد راستوں میں مسافروں میں کورونا وائرس کی تشخیص کے لیے سونگھنے والوں کتوں کا استعمال کر چکا ہے۔

اس سے قبل وزارت داخلہ کے حکام نے کہا تھا کہ ’پولیس کے ان سونگھنے والے کتوں کو ابو ظبی اور شارجہ کے ایئرپورٹس اور الغويفات سرحد پر تعینات کیا گیا ہے۔‘