امارات میں کورونا وائرس کے نئے کیسز پھر بڑھنے لگے

متحدہ عرب امارات میں کورونا وائرس کے نئے کیسز پھر بڑھنے لگے ہیں۔ پیر کو پچھلے چوبیس گھنٹے میں ایک ہزار 512 نئے مریضوں کی تصدیق ہوئی ہے۔

نئے مریض مختلف قومیت کے ہیں، ان سب کی حالت مستحکم ہے اور انہیں ضروری علاج فراہم کیا جارہا ہے۔ نئے کیسز کے بعد امارات میں وائرس کے مجموعی متاثرین کی تعداد 5 لاکھ 57 ہزار 619 ہوگئی ہے۔ 

امارات کی سرکاری خبر رساں ایجنسی وام نے وزارت صحت کے حوالے سے بتایا کہ’ پچھلے چوبیس گھنٹے کے دوران جدید تشخیصی آلات کی مدد سے کورونا کے مزید ایک لاکھ 78 ہزار 528 ٹیسٹ کیے گئے ہیں‘۔

وزارت کے مطابق’ پچھلے چوبیس گھنٹے کے دوران زیرعلاج مریضوں میں سے مزید تین مریض چل بسے، مرنے والوں کی تعداد بڑھ کر ایک ہزار 654 ہوگئی ہے‘۔

 وزارت نے عوام کو احتیاطی تدابیر اورسماجی فاصلے کی پابندی جاری رکھنے کی پھر ہدایت کی ہے۔ 

بیان میں کہا گیا کہ ’متاثرہ مریضوں میں سے مزید ایک ہزار481 مکمل صحتیاب ہوگئے ہیں ۔ صحتیاب ہونے والوں کی تعداد بڑھ کر 5 لاکھ 37 ہزار 531 ہوگئی‘۔ 

 علاوہ ازیں وزارت صحت کی جانب سے جاری بیان میں کہا گیا ہے کہ’ پچھلے چوبیس گھنٹے میں  کورونا ویکسین کی مزید 61 ہزار 323 خوراکیں دی گئی ہیں۔ اب تک ویکسین کی ایک کروڑ کروڑ 21 لاکھ 65 ہزار 848 خوراکیں دی جاچکی ہیں‘۔