امارات میں کورونا کے ایک ہزار 520 نئے کیسز، تین لاکھ کے قریب مزید ٹیسٹ

متحدہ عرب امارات میں سنیچر دس جولائی کو پچھلے چوبیس گھنٹوں کے دوران کورونا کے مزید ایک ہزار 520 نئے مریضوں کی تصدیق ہوئی ہے۔

نئے مریض مختلف قومیت سے ہیں، ان سب کی حالت مستحکم ہے اور انہیں ضروری علاج فراہم کیا جارہا ہے۔ ملک میں وائرس کے مجموعی متاثرین کی تعداد 6 لاکھ 48 ہزار 702 ہوگئی ہے۔ 

امارات کی سرکاری خبر رساں ایجنسی وام نے وزارت صحت کے حوالے سے بتایا کہ ’پچھلے چوبیس گھنٹوں کے دوران جدید تشخیصی آلات کی مدد سے مزید 2 لاکھ 99 ہزار 363 ٹیسٹ کیے گئے ہیں۔‘ 

بیان میں کہا گیا کہ ’وبا سے متاثرہ مریضوں میں سے مزید ایک ہزار 468 مکمل صحت یاب ہوئے ہیں۔ صحت یاب ہونے والوں کی تعداد بڑھ کر 6 لاکھ 26 ہزار 800 ہوگئی ہے۔‘

وزارت نے بتایا کہ ’چوبیس گھنٹے کے دوران زیرعلاج مریضوں میں سے مزید 7 مریض چل بسے۔ مرنے والوں کی تعداد ایک ہزار860 ہوگئی ہے۔‘

وزارت نے عوام کو احتیاطی تدابیر اور سماجی فاصلے کی پابندی جاری رکھنے کی پھر ہدایت کی ہے۔