ریاض کے پہلے فٹبال سٹیڈیم ’الصائغ‘ کا قصہ کیا ہے

کھیلوں کی سعودی وزارت مملکت کے مختلف علاقوں میں فٹبال کے تقریبا 50 سٹیڈیم قائم کر چکی ہے- سپورٹس تنصیبات وزارت کی ترجیحات میں سب سے اوپر ہے- 

اخبار 24 کے مطابق سعودی دارالحکومت ریاض کے الملز محلے میں ’الصائغ‘ سٹیڈیم کا قصہ مختلف ہے- یہ تقریبا 6 عشرے قبل قائم کیا گیا تھا- یہ ریاض شہر میں فٹبال کا پہلا سٹیڈیم مانا جاتا ہے- یہاں باقاعدہ اور دوستانہ مقابلے ہوتے رہے ہیں- ریاض کے فٹبال کلبز کی تاریخ اس سے جڑی ہوئی ہے- 

الصائغ سٹیڈیم  1378ھ مطابق 1958 میں قائم کیا گیا تھا- اس کے قیام کا سہرا چار ملازمین محمد الصائغ، حمزہ جعلی، یوسف عابد اور عبداللہ اخضر کے سر جاتا ہے- چاروں رفقائے کار نے ایوان شاہی سے پلاٹ عطا کرنے کی درخواست کی تھی جہاں وہ فٹبال کھیلنے کا شوق پورا کر سکیں- ایوان شاہی نے ان کے نام سے ایک پلاٹ کا عطیہ کر دیا تھا جس پر انہوں نے الصائغ سٹیڈیم قائم کیا- 

1381ھ مطابق 1961 کے بعد جب ریاض میں کنگ کپ کے فائنل میچ اور سیمی فائنل کے مقابلے ہوئے اور پھر گزشتہ صدی ہجری کے 8 ویں عشرے میں ولی عہد کپ ٹورنامنٹ کے مقابلے ہوئے- تب اس کو جدید خطوط پر استوار کیا گیا- اس میں  8 فائنل میچ ہوئے- 

الصائغ سٹیڈیم میں ان دنوں فٹبال کی متعدد ٹیمیں مشق  کرتی ہیں- ان میں پہلے دوسرے اور تیسرے درجے کی فٹبال ٹیمیں اپنی  استعداد بڑھانے اور چمکانے کے لیے میچز کھیلتی ہیں- کئی باقاعدہ مقابلے بھی یہاں منعقد ہوتے ہیں-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں