ساھرسسٹم کو تباہ کرنے پر2 سعودی گرفتار
ملزمان کیمرے توڑکرجائے وقوعہ سے فرار ہوگئے تھے(فوٹو، ٹوئٹر)
قصیم پولیس نے ٹریفک خلاف ورزیاں ریکارڈ کرنے والےسسٹم’ ساھر‘ کو تباہ کرنے کے الزام میں 2 سعودی شہریوں کو گرفتار کر لیا ہے۔
اخبار 24 کے مطابق قصیم پولیس کے ترجمان نے کہا ہے کہ ریجن کی ایک اہم شاہراہ پرنصب ’ساھر‘ سسٹم کے کیمرے میں توڑ پھوڑ کی رپورٹ ملتے ہی واردات کرنے والوں کا تعاقب شروع کردیا گیا تھا۔
ملزمان کی جلد ہی شناخت کرلی گئی جن کی تعداد 2 تھی۔ دونوں مقامی شہری ہیں ۔ ملزمان شاہراہ پر نصب ساھر کے کیمرے تباہ کیے اور جائے وقوعہ سے فرار ہوگئے تھے۔
ترجمان کا مزید کہنا تھا کہ ملزمان کا خیال تھا کہ وہ قانون کی گرفت میں نہیں آئیں گے تاہم انہیں ریکارڈ وقت میں حراست میں لے لیا گیا۔
پولیس ترجمان نے کہا ہے کہ دونوں کو ابتدائی قانونی کارروائی کے بعد قصیم میں پبلک پراسیکیوشن برانچ کے حوالے کر دیا گیا ہے جہاں سے انکا کیس فوجداری عدالت کو بھیجا جائے گا۔
