امارات میں کورونا کے نئے کیسز میں مسلسل کمی، صحت یاب ہونے والے زیادہ

متحدہ عرب امارات میں کورونا کے نئے کیسز مسلسل کم ہو رہے ہیں جبکہ صحت یاب ہونے والوں کی شرح میں بھی اضافہ ہوا ہے۔

وزارت صحت کے مطابق جمعے کو گذشتہ 24 گھنٹوں کے دوران کورونا کے 4 لاکھ 95 ہزار 628 ٹیسٹ کیے گئے۔ ایک ہزار 474 نئے مریضوں کی تشخیص ہوئی ہے۔

امارات کے سرکاری خبر رساں ادارے ’وام‘ نے وزارت صحت کے حوالے سے بتایا کہ’ نئے کیسز کے بعد متاثرین کی کل تعداد 8 لاکھ 65 ہزار576 تک پہنچ گئی ہے‘۔

بیان میں کہا گیا کہ ’گذشتہ 24 گھنٹوں کے دوران 2 ہزار421 افراد صحت یاب ہوئے ہیں۔ صحت یاب ہونے والوں کی تعداد بڑھ کر7 لاکھ 96 ہزار 40 ہوگئی ہے۔‘

’زیرعلاج مریضوں میں سے مزید 5 چل بسے، مرنے والوں کی کل تعداد دو ہزار 283 ہوگئی ہے‘۔

علاوہ ازیں وزارت صحت نے بیان میں کہا کہ ’گذشتہ 24 گھنٹوں کے دوران کورونا ویکسین کی مزید 25 ہزار 940 خوراکیں دی گئی ہیں۔ اب تک 2 کروڑ 38 لاکھ 32 ہزار313 خوراکیں دی جاچکی ہیں۔‘