پاکستان کی جازان ایئرپورٹ پر حوثیوں کے حملے کی شدید مذمت

پاکستان نے حوثیوں کی جانب سے سعودی عرب کے جازان ایئرپورٹ کو نشانہ بنانے کی کوشش کی مذمت کی ہے۔

ترجمان دفتر خارجہ کی جانب سے منگل کو جاری ہونے والے بیان کے مطابق ’پاکستان حوثیوں کی جانب سے جازان کے شاہ عبداللہ ایئرپورٹ کو ڈرون سے نشانہ بنانے کی شدید مذمت کرتا ہے جس کے نتیجے میں کئی افراد زخمی ہوئے ہیں۔‘

ترجمان کا کہنا ہے کہ ’پاکستان حملے میں زخمی ہونے والوں کی جلد صحت یابی کا خواہش مند ہے۔‘

’اس قسم کے حملے نہ صرف بین الاقوامی قوانین کی خلاف ورزی ہیں بلکہ مملکت سعودی عرب اور خطے میں امن اور سلامتی کے لیے بھی خطرہ ہیں۔‘

بیان میں مزید کہا گیا ہے کہ ’پاکستان فوری طور پر ان حملوں کو روکنے کا مطالبہ کرتا ہے۔‘

’پاکستان سعودی عرب کی سالمیت اور سلامتی کو درپیش کسی بھی خطرے پر اس کے ساتھ مکمل تعاون اور یکجہتی کا اظہار کرتا ہے۔‘