امارات میں کورونا کے 382 نئے مریض، کوئی ہلاکت نہیں ہوئی
متاثرین کی کل تعداد 8 لاکھ 84 ہزار736 تک پہنچ گئی ہے(فوٹو ٹوئٹر)
متحدہ عرب امارات میں کورونا کے نئے کیسز میں کمی کا سلسلہ جاری ہے۔ پچھلے چوبیس گھنٹے میں 382 نئے مریض سامنے آئے ہیں۔
وزارت صحت کے مطابق جمعہ 11 مارچ کو گذشتہ چوبیس گھنٹے کے دوران کورونا کے 3 لاکھ 32 ہزار 599 ٹیسٹ کیے گئے۔
امارات کے سرکاری خبر رساں ادارے ’وام‘ نے وزارت صحت کے حوالے سے بتایا کہ’ نئے کیسز کے بعد متاثرین کی کل تعداد 8 لاکھ 84 ہزار736 تک پہنچ گئی ہے‘۔
بیان میں کہا گیا کہ ’گذشتہ 24 گھنٹوں کے دوران ایک ہزار93 افراد صحت یاب ہوئے ہیں۔ صحت یاب ہونے والوں کی تعداد بڑھ کر8 لاکھ 49 ہزار123 ہوگئی ہے۔‘
’ گزشتہ ایک ہفتے میں کورونا کے زیرعلاج مریضوں میں سے کوئی ہلاکت نہیں ہوئی، مرنے والوں کی کل تعداد دو ہزار302 ہے‘۔
علاوہ ازیں وزارت صحت نے بیان میں کہا کہ ’گذشتہ 24 گھنٹوں کے دوران کورونا ویکسین کی مزید 12 ہزار798 خوراکیں دی گئی ہیں۔ اب تک 2 کروڑ 43 لاکھ 6 ہزار 708 خوراکیں دی جاچکی ہیں۔‘