لاہور ... پاکستانی بولر سہیل خان نے کہا ہے کہ میرے اور مکی آرتھر کے درمیان کوئی مسئلہ نہیں۔اس حوالے سے افواہوں کی تردید کرتا ہوں۔ سہیل خان نے ٹو ئٹرپر بیان میں کہا کہ میرے اور مکی آرتھر کے درمیان پیشہ وارانہ تعلقات ہیں ۔ میرے دل میں ان کے لئے بہت عزت ہے۔ اسی طرح لیجنڈ انضمام الحق اور سلیکٹرز کے ساتھ بھی میرا کوئی مسئلہ نہیں ۔انہوں نے کہا کہ میرا کام پاکستان کے لئے سخت محنت کرنا اور بہترین شو لگانا ہے جو ہمیشہ کیا ہے۔ اللہ کا شکر ادا کرتا ہوں کہ میرا گرین شرٹ پہننے کا خواب پورا ہو گیا۔ انہوں نے اپنی موجودہ فارم سے خوشی کا اظہار کرتے ہوئے کہا کہ میرا کام سخت محنت کرتے ہوئے پاکستان کیلئے بہتر کارکردگی دکھانا ہے۔ واضح رہے کہ میڈیا سمیت سابق کرکٹرز نے عمدہ بولنگ کے باوجود سہیل خان کو دورہ ویسٹ انڈیز کیلئے منتخب نہ کرنے کو خراب فیصلہ قرار دیتے ہوئے فاسٹ بولر کے ٹیم سے اخراج کی وجہ مکی آرتھر کی ناپسندیدگی کو قرار دیا ہے۔
