عمرہ زائرین کے لیے ماسک کی پابندی، مسجد الحرام کے کون سے دروازے مختص ہیں؟

سعودی عرب میں عمرہ سیکیورٹی فورس کے کمانڈرمیجرجنرل محمد البسامی نے کہا ہے کہ رمضان کے دوران عمرہ موسم کامیاب بنانے کےلیے تمام متعلقہ اداروں کے ساتھ مل کر کام کریں گے۔

گزشتہ برسوں کے دوران عمرہ موسم کے حوالے سے تمام سکیموں کا جائزہ لے کر نئی جامع سکیم پرعمل کیا جائے گا۔ 

ایس پی اے اور العربیہ کے مطابق مطابق میجر جنرل محمد البسامی نے کہا کہ’ مسجد الحرام کے آس پاس عمرہ زائرین کو حفاظتی ماسک کی پابندی کرنی ہوگی‘۔

عمرہ سیکیورٹی فورس کے کمانڈر نے جمعے کو پریس بریفنگ میں کہا کہ مطاف کا صحن اور مسجد الحرام کی پہلی منزل عمرہ زائرین کےلیے مختص ہے جبکہ کنگ فہد، العمرہ، السلام ، کنگ عبدالعزیز دروازے اورالمروہ گیٹ عمرہ زائرین کے داخلے کےلیے مختص کیے گئے ہیں۔

انہوں نے کہا کہ ’رمضان میں عمرے کےلیے اجازت نامہ ضروری ہے۔ یہ فیصلہ نظم و ضبط کا معیار بہتر بنانے کے لیے کیا گیا ہے تاہم مسجد الحرام اور اس کے صحنوں میں نمازادا کرنے کےلیے اجازت نامہ ضروری نہیں ہے‘۔ 

میجر جنرل محمد البسامی کا کہنا ہے کہ’ مسجد الحرام میں تیسری سعودی توسیع اور مطاف کےلیے راہداری بنائی جا رہی ہے تاکہ عمرہ زائرین مروہ سے نکل کر مغربی صحن (الشبیکہ) ، جبل عمر اورابراہیم خلیل سٹریٹ کی طرف نکل سکیں‘۔  

 جرول سٹیشن سے مسجد الحرام کی شمالی توسیع تک نمازیوں کےلیے کعبہ اور الشبیکہ راہداریاں تیار ہیں۔ صفا و مروہ کی مشرق کی جانب بنی شیبہ پل عمرہ زائرین کےلیے خاص ہو گا وہ عمرہ سے فارغ ہو کر پل کے راستے الشامیہ راہداری اور وہاں سے مسجد الحرام کی مغربی توسیع والی عمارت جاسکیں گے۔ اس طرح شمال اور جنوب کے درمیان زائرین کے اجتماع میں توازن پیدا ہو گا‘۔

عمرہ سیکیورٹی فورس کے معاون کمانڈر برائے گشتی فورس میجر جنرلعلی القحطانی نے کہا کہ’ سیکیورٹی فورس مسجد الحرام اورمسجد نبوی میں ںماز کے دوران زائرین سے حفاظتی ماسک کی پابندی کرائے گی‘۔