’پہلے ایک معمولی ڈرائیور تھا اب ملک بھر سے فون آرہے ہیں‘

اپنی جان کو خطرے میں ڈال کر لوگوں کی زندگیاں بچانے والے آئل ٹینکر ڈرائیور محمد فیصل کی ہمت کو سوشل میڈیا اور حکومتی شخصیات کی جانب سے سراہا گیا ہے۔ 

وزیراعظم آفس نے محمد فیصل کو 'گیسٹ آف آنر ' کے طور پر اسلام آباد مدعو کر لیا ہے۔ وزیراعظم آفس کے سٹریٹجک ریفارمز شعبے کے سربراہ سلمان صوفی نے محمد فیصل کو ٹیلیفون کیا اور وزیراعظم شہباز شریف کی طرف سے ان کا شکریہ ادا کیا۔

سلمان صوفی نے ٹویٹر پر لکھا کہ فیصل وہ ہیرو ہے جس نے بلوچستان میں لاتعداد جانیں بچائیں، انہوں نے پاکستان کا سر فخر سے بلند کیا۔

سلمان صوفی کے مطابق مالی انعام کے علاوہ وزیراعظم کی درخواست پر محمد فیصل کو وزیراعلیٰ بلوچستان ان کی اہلیت کے مطابق ملازمت بھی دیں گے-

وزیراعلیٰ بلوچستان عبدالقدوس بزنجو نے بھی ڈرائیور کی بہادری کو سراہتے ہوئے ان کے لیے پانچ لاکھ روپے انعام کا اعلان کیا ہے۔ 

وزیراعلیٰ نے اپنے ایک بیان میں کہا کہ محمد فیصل کی جرات اور بہادری قابل ستائش ہے، انہوں نے اپنی جان خطرے میں ڈال کر دوسروں کی جان بچائی ہے۔

دو روز قبل کوئٹہ کے علاقے قمبرانی روڈ پر ایک نجی پیٹرول پمپ پر پیٹرول خالی کرتے ہوئے ایک ٹینکر میں آگ بھڑک اٹھی تھی۔

پیٹرول پمپ پر موجود لوگوں کو بچانے کے لیے ٹینکر ڈرائیور محمد فیصل حاضر دماغی کا مظاہرہ کرتے ہوئے آگ کے شعلوں میں لپٹے ٹینکر کو آبادی سے دور لے گئے۔ 

محمد فیصل نے اردو نیوز کو بتایا کہ ٹینکر میں 20 ہزار لیٹر سے زائد پیٹرول موجود تھا اور اس کے پھٹنے کا خطرہ تھا، اگر پھٹ جاتا تو بہت سے لوگوں کی جانیں جاسکتی تھیں۔

’اس لیے میں نے اپنی جان کی پرواہ کیے بغیر ٹینکر کو دور لے جانے کا فیصلہ کیا۔‘

حادثے کی ویڈیوز کسی فلمی سین سے کم نہیں ہیں۔ ان میں دیکھا جاسکتا ہے کہ ایک چلتے ہوئے ٹینکر میں سے آگ نکل رہی جو ایک لمبی قطار کی شکل میں دور تک پھیلی ہوئی ہے۔

محمد فیصل کی بہادری کو سوشل میڈیا پر نہ صرف عام صارفین بلکہ کئی معروف شخصیات نے بھی سراہا ہے۔

سابق کرکٹر وسیم اکرم کی اہلیہ شنیرا اکرم نے اردو نیوز کی ویڈیو شیئر کرتے ہوئے ٹوئٹر پر محمد فیصل کی بہادری کی تعریف اور انہیں نیشنل ایوارڈ دینے کا مطالبہ کیا۔ انہوں نے لکھا کہ محمد فیصل کے اس بے لوث کام کو اعلیٰ سطح پر سراہا جانا چاہیے۔

امحمد فیصل نے بتایا کہ وہ پہلے ایک معمولی ڈرائیور تھے اور بہت کم لوگ انہیں پہنچاتے تھے لیکن اب ملک بھر سے لوگ ٹیلی فون کر کے انہیں سراہ رہے ہیں اور عزت بخش رہے ہیں۔ پورے شہر سےافسران اور عام شہری انہیں ملنے آ رہے ہیں۔

محمد فیصل پذیرائی ملنے پر خوش ہیں اور کہتے ہیں کہ اللہ تعالیٰ نے انہیں اس لیے عزت دی کیونکہ مشکل وقت میں انہوں نے اپنے نہیں بلکہ دوسروں کے بارے میں سوچا اور انسانی جانوں کو بچایا۔

محمد فیصل کا تعلق ایک غریب خاندان سے ہے جو دو نسلوں سے ڈرائیورنگ کے شعبے سے وابستہ ہے۔

محمد فیصل نے بتایا کہ وہ  صرف 13 ہزار روپے تنخواہ پر کام کرتے ہیں جس سے بڑی مشکل سے گزر بسر ہوتی ہے۔