جیسن روئے کا پی ایس ایل پر بیان، انڈین میڈیا کی تنازع کھڑا کرنے کی کوشش

انگلینڈ کے اوپننگ بیٹسمین اور پاکستان سپر لیگ (پی ایس ایل) میں کوئٹہ کی نمائندگی کرنے والے جیسن روئے کے ایک بیان پر انڈین میڈیا کی رپورٹنگ سوشل میڈیا صارفین کے زیرِبحث ہے اور اس پر تنقید کی جا رہی ہے۔

دو دن قبل جیسن روئے نے ’سکائی نیوز‘ کو دیے گئے ایک انٹرویو میں کہا تھا کہ ’ذہنی طور پر میرے لیے کچھ چیزیں درست نہیں تھیں۔ پی ایس ایل کے دوران عجیب صورتحال تھی کیونکہ میں اچھی کرکٹ کھیل رہا تھا لیکن اس سے لطف اندوز نہیں ہو رہا تھا۔‘

انہوں نے مزید کہا تھا کہ ’میں خوش نہیں تھا اور وہ ایک تاریک وقت تھا۔‘

انڈین میڈیا کی جانب سے ان کے اس بیان کو سیاق و سباق سے ہٹ کر رپورٹ کیا گیا۔

خیال رہے جیسن روئے پی ایس ایل 2022 میں کوئٹہ گلیڈی ایٹرز کی نمائندگی کررہے تھے، جہاں انہوں نے صرف چھ میچ کھیل کر ایک سینچری اور دو نصف سینچریوں کی مدد سے 303 رنز بنائے تھے۔

جیسن روئے کے پورے انٹرویو کو اگر ایک نظر پڑھا جائے تو ایک بات واضح ہوتی ہے کہ وہ پی ایس ایل کی برائی نہیں کررہے تھے بلکہ وہ کورونا وائرس کے دوران ہوٹلوں میں طویل قرنطینہ اور خاندان سے دوری پر پریشان تھے۔

ان کا کہنا تھا کہ ’میں بہت مہینوں [خاندان سے] دور تھا۔ ایک سال پہلے ہی 50 سے زائد دن ہوٹل میں گزارے اور پھر جنوری میں میرے بچے کی پیدائش ہوئی اور اس سے دور وقت گزارنا مشکل تھا۔‘

اسی وجہ سے انہوں نے انڈین پریمیئر لیگ (آئی پی ایل) میں بھی کھیلنے سے معذرت کرلی تھی۔

انہوں نے کہا کہ ’میں نے گھر میں کچھ وقت گزارنے کے لیے آئی پی ایل چھوڑی اور اس سے میرے دماغ اور جسم میں تازگی پیدا ہوئی۔‘

پاکستانی صحافی عرفہ فیروز نے جیسن روئے کے حوالے سے انڈین میڈیا کی کوریج پر تبصرہ کرتے ہوئے لکھا ’انڈین میڈیا جیسن روئے کے پی ایس ایل کے حوالے سے بیان پر تنازع کھڑا کرنے کی ناکام کوششں کر رہا ہے۔‘

انہوں نے مزید لکھا کہ ’جیسن روئے ذہنی صحت اور کورونا وائرس کے ببل کی بات کر رہے تھے۔‘

کچھ صارفین نے انڈین صحافیوں کو یہ بھی یاد دلایا کہ ’جیسن روئے نے پی ایس ایل مکمل کی تھی جبکہ آئی پی ایل انہوں نے بیچ میں ہی ادھوری چھوڑ دی تھی۔‘

اسماعیل مدنی نامی صارف نے لوگوں کو یاد دلایا کہ ’جیسن روئے نے یونس خان کے ساتھ پاکستان میں ایک سم کارڈ کے اشتہار میں بھی کام کیا تھا پی ایس ایل سے قبل۔‘

واضح رہے 19 جون کو جیسن روئے نے انگلینڈ کی طرف سے اپنا 100 واں ون ڈے میچ نیدرلینڈز کے خلاف کھیلا تھا اور صرف 60 گیندوں پر 73 رنز کی جارحانہ اننگز کھیلی تھی۔