ٹریفک قوانین کی تلقین کے لیے بالی وڈ فلموں کے ڈائیلاگز کا سہارا

انڈیا کے دارالحکومت دہلی کی پولیس نے شہریوں کو ٹریفک قوانین کے احترام کی تلقین کے لیے بالی وڈ فلموں اور ان کے ڈائیلاگز کا سہارا لینا شروع کر دیا ہے۔

دنیا کے کئی ممالک خصوصاً پاکستان اور انڈیا میں لوگ اکثر جلدبازی میں سگنلز کو نظرانداز کرتے ہوئے گاڑیاں بھگا لے جاتے ہیں۔

دہلی پولیس نے اس حوالے لوگوں کو قوانین کا احترام کرنے کی تلقین کچھ اس طرح کی: ’ویر نے زارا سے ملنے کے لیے 22 برس انتظار کیا۔ آپ بھی سگنل پر سرخ لائٹ دیکھ کر کچھ سیکنڈز رک سکتے ہیں۔‘

’ویر زارا‘ 2004 میں ریلیز ہونے والی ایک فلم تھی جس میں مرکزی کردار شاہ رخ خان، پریٹی زنٹا اور رانی مکھرجی نے نبھائے تھے۔

اس فلم میں شاہ رخ خان کو ایک پاکستانی لڑکی (پریٹا زنٹا) سے محبت ہوجاتی ہے۔ پھر کہانی میں ایک ایسا موڑ آتا ہے کہ دونوں ایک دوسرے سے جدا ہوجاتے ہیں اور 20 برس کے بعد فلم کے اختتام پر ان کی ملاقات ہوتی ہے۔

اسی طرح ایک اور ٹویٹ میں دہلی پولیس نے لوگوں کو تیز گاڑیاں چلانے سے روکنے کے لیے مشہور زمانہ گیم ’گرینڈ ٹھیفٹ آٹو‘ (جی ٹی اے) کا سہارا لیا۔

اس گیم کا کلپ لگاتے ہوئے دہلی پولیس نے لکھا ’زندگی جی ٹی اے کی گیم نہیں۔ ایسے گاڑیاں نہ چلائیں جیسے آپ کے پاس متعدد زندگیاں اور چیٹ کوڈز ہوں۔‘

ایک اور ٹویٹ میں دہلی پولیس کی جانب سے شہریوں کو موٹر سائیکل پر ہیلمٹ پہننے کی تلقین کی گئی اور اس کے لیے بھی ایک فلمی سین اور ڈائیلاگ کا سہارا لیا گیا ہے۔

فلم کے سین کی میم میں اداکار رنبیر کپور اپنی ساتھی اداکارہ کو کہہ رہے ہیں ’ایشا، میں آگ سے نہیں ڈرتا، بغیر ہیلمٹ کے موٹر سائیکل چلانے سے ڈرتا ہوں۔‘

نئی دہلی کا شمار ٹریفک حادثات کے اعتباد سے دنیا کے خطرناک شہروں میں ہوتا ہے۔ ’پریس ٹرسٹ آف انڈیا‘ کی ایک رپورٹ کے مطابق نئی دہلی میں 2022 کے پہلے پانچ مہینوں میں 2300 سے زائد ٹریفک حادثات رپورٹ ہوئے۔

ان حادثات میں 505 افراد ہلاک اور 495 افراد شدید زخمی ہوئے تھے۔