شمالی وزیرستان میں خودکش حملہ، صدر اور وزیراعظم کی مذمت

وزیراعظم شہباز شریف نے شمالی وزیرستان کے علاقے میر علی میں فوجی قافلے پر خودکش حملے کی مذمت کرتے ہوئے کہا ہے کہ دہشت گردی کے ناسور کے خاتمے تک پوری قوم متحد ہو کر اس کا مقابلہ کرتی رہے گی۔

منگل کو وزیراعظم نے ٹویٹ کیا کہ چار فوجیوں کی ہلاکت پر قوم دکھی اور رنجیدہ ہے۔

’اللہ تعالی سے دعا ہے کہ وہ ان شہدا کی ملک کے دفاع اور امن کے لیے دی جانے والی قربانیوں کو قبول فرمائے اور ان کے پسماندگان کو صبر جمیل عطا کرے۔ شہدا ہمارے سر کا تاج ہیں۔‘

پاکستان فوج کے شعبہ تعلقات عامہ (آئی ایس پی آر) نے کہا ہے کہ میرعلی میں فوجی قافلے پر خودکش حملے میں چار فوجی ہلاک ہوئے ہیں۔

آئی ایس پی آر کے مطابق انٹیلی جنس ایجنسیاں خودکش حملہ آور اور اس کے سہولت کاروں سے متعلق تحقیقات کر رہی ہیں۔

’فوج دہشت گردی کے ناسور کے خاتمے کے لیے پرعزم ہے، ہمارے بہادر جوانوں کی قربانیاں رائیگاں نہیں جائے گی۔‘

ہلاک ہونے والے چار فوجیوں میں لانس نائیک شاہ زیب، لانس نائیک سجاد، سپاہی عمیر اور سپاہی خرم شامل ہیں۔

صدر عارف علوی نے بھی شمالی وزیرستان میں فوجی قافلے پر خودکش حملے کی مذمت کی ہے۔

وفاقی وزیر داخلہ رانا ثنا اللہ خان نے شمالی وزیرستان کے علاقے میر علی میں فوجی قافلے پر خودکش حملے کی مذمت کرتے ہوئے کہا ہے کہ سکیورٹی فورسز ایسے بزدلانہ حملوں سے خوفزدہ نہیں ہوں گے۔

’وطن کی حفاظت کی خاطر کسی بھی قربانی سے دریغ نہیں کریں گے۔‘