ایف آئی اے کی حوالہ، ہنڈی کے خلاف کارروائی، ہزاروں سعودی ریال اور اماراتی درہم برآمد

پاکستان کے وفاقی تحقیقاتی ادارے (ایف آئی اے) نے خیبر پختونخوا کے دو علاقوں میں کارروائیوں کے دوران حوالہ اور ہنڈی کے کاروبار سے منسلک تین افراد کو گرفتار کرتے ہوئے لاکھوں روپے کی مقامی اور غیرملکی کرنسی ضبط کرلی ہے۔

بدھ کو ایف آئی اے کے ترجمان کی جانب سے سوشل میڈیا پر جاری کیے گئے ایک بیان میں کہا گیا ہے کہ ادارے کے کمرشل بینکنگ سرکل نے چترال اور دیر میں کارروائیاں کرتے ہوئے محمد ایوب، گل زمین اور محمد وارث نامی افراد کو گرفتار کیا ہے۔

بیان کے مطابق گرفتار افراد سے حوالہ اور ہنڈی سے متعلق رسیدیں، 55 ہزار 858 سعودی ریال، 4 ہزار 310 اماراتی درہم اور 37 لاکھ سے زائد پاکستانی روپے برآمد بھی کیے ہیں۔

گرفتار افراد کے خلاف فارن ایکسچینج ریگولیشن ایکٹ کے تحت مقدمات درج کیے گئے ہیں اور ان سے مزید تفتیش کی جارہی ہے۔

گزشتہ ماہ بھی ایف آئی اے نے لاہور اور صوبہ سندھ کے مختلف علاقوں میں غیر قانونی منی چینجرز کے خلاف کاروائیاں کی تھیں اور ان کے قبضے سے امریکی ڈالر اور سعودی ریال سیمت لاکھوں روپے مالیت کی غیرملکی کرنسی برآمد کی تھی۔