سب سے زیادہ وکٹیں، شاداب خان نے شاہد آفریدی کو پیچھے چھوڑ دیا

پاکستان کرکٹ ٹیم کے لیگ سپنر شاداب خان نے ایک اور اعزاز اپنے نام کرلیا ہے۔ شاداب خان ٹی20 کرکٹ میں پاکستان کی جانب سے سب سے زیادہ وکٹیں حاصل کرنے والے بولر بن گئے ہیں۔

اتوار کے روز سماجی رابطوں کی ویب سائٹ ٹوئٹر پر پاکستان کرکٹ بورڈ (پی سی بی) نے شاداب خان کی جانب سے سب سے زیادہ وکٹیں حاصل کرنے کی تصدیق کی۔

شاداب خان نے پاکستان کی طرف سے 98 وکٹیں حاصل کرکے سابق لیگ سپنر شاہد آفریدی کو پیچھے چھوڑ دیا ہے۔

شاداب خان نے ٹیم کی نمائندگی کرتے ہوئے ٹی20 کرکٹ میں 84 میچز کھیل کر 98 وکٹیں حاصل کی ہیں۔

دوسری جانب ٹی20 ورلڈ کپ میں بھی شاداب خان کی کارکردگی عمدہ رہی ہے۔ لیگ سپنر نے ٹورنامنٹ میں 11 کھلاڑیوں کو آؤٹ کیا۔

اس سے پہلے پاکستان کی جانب سے ٹی20 کرکٹ میں سب سے زیادہ وکٹیں حاصل کرنے کا اعزاز شاہد آفریدی کو حاصل تھا۔

اگر ٹی20 کرکٹ میں سب سے زیادہ وکٹیں حاصل کرنے والے پاکستانی کھلاڑیوں کی فہرست دیکھی جائے تو اس میں شاداب خان 98 وکٹوں کے ساتھ پہلے، جبکہ شاہد آفریدی 99 ٹی20 میچز کھیل کر 98 وکٹوں کے ساتھ دوسرے نمبر پر ہیں۔

اس کے علاوہ سابق فاسٹ بولر عمر گل نے 60 میچز میں 85 کھلاڑیوں کو آؤٹ کیا جس کے بعد وہ اس فہرست میں تیسرے نمبر پر ہیں۔

شاداب خان کے علاوہ پاکستان کے لیے ٹی20 کرکٹ میں زیادہ وکٹیں حاصل کرنے والے دوسرے سپنر سعید اجمل ہیں۔ سعید اجمل نے 64 میچز میں 85 وکٹیں حاصل کیں۔

پاکستانی ٹیم کے فاسٹ بولر اور ڈیتھ اوورز کے سپیشلسٹ حارث رؤف 57 میچز کھیل کر اب تک 72 وکٹیں حاصل کرچکے ہیں۔