دمام شاہراہ پربس حادثہ ، دو ہلاک 9 زخمی

دمام شاہراہ پربس حادثے میں دو افراد ہلاک جبکہ 9 زخمی ہوگئے۔ حادثہ دمام شاہراہ پرواقع المعادن پل کے بعد پیش آیا۔

اخبار 24 کے مطابق ریجنل ہلال الاحمر کی جانب سے حادثے کی تفصیلات  کے بارے میں کہا گیا ہے کہ ہلال الاحمر کے کنٹرول روم میں حادثہ کی اطلاع ایک سعودی شہری نے دی۔

حادثے کی اطلاع ملتے ہی ہلال الاحمر اورشہری دفاع کے متعدد یونٹس جائے وقوعہ پرپہنچ گئے۔

ہلال الاحمر کے 3 ہنگامی یونٹ فوری طورپرجائے حادثہ پہنچے جبکہ تھوڑی ہی دیر بعد مزید 7 امدادی یونٹس متاثرہ مقام پرپہنچ گئے۔

امدادی ٹیموں نے حادثے کے متاثرین کو ابتدائی طبی امدادفراہم کرنے کے ساتھ ہی انہیں ایمبولینسوں کے ذریعے قریبی ہسپتال منتقل کردیا۔

ہلال الاحمر کے ذرائع کا کہنا تھا کہ حادثہ میں دو افراد موقع پرہی ہلاک ہوگئے تھے۔

 زخمیوں میں سے 2 کی حالت نازک ہےجبکہ دیگر کودرمیانے درجے کے زخم آئے جنہیں فوری طبی امداد فراہم کرنے کے بعد ہسپتال منتقل کردیا گیا ۔ ہلاک شدگان کی نعشوں کو سرد خانے میں رکھوادیا گیا۔