مکہ: شوروم سے مہنگی کار چرانے والا گرفتار

مکہ مکرمہ کے مشہور شو روم سے قیمتی گاڑی ’لگزس‘ اچانک چوری ہوگئی۔  سیکیورٹی فورس کے اہلکاروں نے سی سی کیمروں کی مدد سے واردات کرنے والے  کی نشاندہی کرلی۔

اخبار  24 کے مطابق شو روم کے ذمہ داران نے بتایا  کہ گاڑی چوری کرنے والا عمر کے دوسرے عشرے میں ہے۔ وہ العدل محلے میں واقع شوروم کے  دروازے سے  اندر آیا تھا۔ اس نے شو روم کے اہلکار کو زدوکوب کرکے اس سے گاڑی کی چابی چھینی تھی اور پھر وہاں سے گاڑی لے کر فرار ہوگیا تھا۔

شوروم کے  عہدیداروں نے بتایا کہ فوری طور پر پولیس میں رپورٹ درج کرادی گئی۔ سیکیورٹی فورس نے واردات کرنے والے کی فوری گرفتاری کی مہم شروع کردی۔ معائنے سے  پتہ چلا کہ مسروقہ کار مکہ مکرمہ کے  الراشدیہ محلے میں ایک پنکچر کی دکان کے برابر میں پارک کی گئی ہے اور اس کے دو ٹائر ناکارہ ہوچکے ہیں۔

سیکیورٹی اہلکاروں نے سی سی کیمرے کی ریکارڈنگ دیکھ کر مختلف علامتوں کی بنیاد پر واردات کرنے والے کی شناخت کرلی اور تعاقب کرتے ہوئے اس تک پہنچ گئے۔

واردات کرنے والے نے پولیس کو دیکھ کر فرار ہونے کی کوشش کی۔ وہ ایک  زیر تعمیر عمارت میں چھپ گیا تھا تاہم اسے گھیر کر تلاش کرلیا گیا۔ اس کے قبضے سے  17 ہزار ریال سے زیادہ نقد رقم برآمد ہوئی۔

فورس نے واردات کرنے والے کو المعابدہ پولیس سٹیشن کے حوالے  کردیا گیا۔ آخر میں المنصور پولیس سٹیشن نے اس کا کیس پبلک پراسیکیوشن کے  حوالے کردیا۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں