امریکہ نے سفارتی عملے کو پاکستان میں’غیر ضروری سفر‘ سے روک دیا

پاکستان کے دارالحکومت اسلام آباد میں دہشت گردی کے خدشات کے باعث امریکی سفارت خانے نے اپنے سٹاف کے لیے حفاظتی ہدایات جاری کر دی ہیں۔

امریکی سفارت خانے کی ویب سائٹ کے مطابق تمام سفارتی عملہ غیر ضروری سفر سے اجتناب کریں۔

اسلام آباد میں امریکی سفارت خانے نے کہا ہے کہ حکومت کو اس بات کا علم ہے کہ نامعلوم افراد چھٹیوں کے دوران اسلام آباد میں واقع میریٹ ہوٹل میں امریکیوں کو نشانہ بنا سکتے ہیں۔ 

’سفارت خانے کی جانب سے اپنے سٹاف کو اسلام آباد میں واقع میریٹ ہوٹل جانے سے منع کیا جا رہا ہے۔ سکیورٹی خدشات کے باعث اسلام آباد میں ریڈ الرٹ ہے، جس کے بعد تمام سفارتی عملے کو اسلام آباد میں چھٹیوں کے دوران غیر ضروری اور نجی سفر سے اجتناب کرنے کی ہدایت کی جا رہی ہے۔‘

خیال رہے کہ جمعے کے روز اسلام آباد میں خود کش دھماکہ ہوا تھا جس میں ایک حملہ آور، ایک پولیس اہلکار اور ایک ٹیکسی ڈرائیور ہلاک ہو گیا تھا۔

اسلام آباد میں پولیس نے سکیورٹی ہائی الرٹ کر دی

جمعے کو اسلام آباد میں خودکش دھماکے کے بعد شہر میں سکیورٹی ہائی الرٹ کر دی گئی ہے۔

اتوار کو اسلام آباد پولیس کی جانب سے جاری بیان میں کہا گیا ہے کہ ریڈزون سمیت شہر کے داخلی اور خارجی راستوں پر چیکنگ بڑھا دی گئی ہے۔

’شہری سفر کے دوران اپنی ضروری شناختی دستاویزات ساتھ رکھیں، اور ریڈزون اور دیگر جگہوں پر چیکنگ کے دوران تعاون کریں۔‘

اسلام آباد پولیس کا مزید کہنا ہے کہ ’شہری کسی بھی مشکوک سرگرمی کی فوراً 15 پر اطلاع کریں۔‘