سائفر کی تحقیقات، جسٹس طارق مسعود کی اپیلیں سننے سے معذرت

سپریم کورٹ آف پاکستان کے جسٹس سردار طارق مسعود نے سائفر کی تحقیقات کے لیے دائر اپیلوں کی سماعت سے معذرت کر لی ہے۔ 

سپریم کورٹ آف پاکستان میں مبینہ طور پر بین الاقوامی سازش کے ذریعے عمران خان کی حکومت گرانے کے لیے سائفر کی تحقیقات کے لیے اپیلیں دائر کی گئیں تھیں جن پر رجسٹرار آفس نے اعتراضات لگائے تھے۔ 

رجسٹرار آفس کے اعتراضات کے خلاف ان چیمبر اپیلوں کی سماعت 24 جنوری کو ہونا تھی تاہم جسٹس سردار طارق مسعود نے اپیلوں کی سماعت سے معذرت کر لی ہے۔ 

جسٹس سردار طارق مسعود نے سائفر کی تحقیقات کے لیے دائر اپیلوں کو واپس چیف جسٹس آف پاکستان کو بھیج دیا ہے۔ انہوں نے موقف اپنایا کہ چیف جسٹس سائفر تحقیقات کی کے لیے ان چیمبر اپیلوں کی سماعت کسی اور جج کے سامنے مقرر کر دیں۔

خیال رہے پچھلے سال مارچ میں اس وقت کے وزیراعظم عمران خان نے اسلام آباد میں جلسے کے دوران دعوٰی کیا تھا کہ ان کی حکومت کو ایک ملک کی جانب سے دھمکی آمیز سائفر موصول ہوا ہے۔

بعدازاں انہوں نے ایک خطاب کے دوران امریکہ کا نام لیتے ہوئے کہا تھا کہ ان کی حکومت کو سازش کے تحت ختم کرایا گیا۔

اسی سائفر کے حوالے سے ان کی چند آڈیوز بھی لیک ہوئی تھیں۔

سائفر کا معاملہ عدالت تک بھی پہنچا تھا اور اس کی تحقیقات کرانے کا مطالبہ کیا گیا تھا اور 21 جنوری کو سائفر کی تحقیقات کے لیے دائر چیمبر اپیلیں سماعت کے لیے مقرر کی گئی تھیں۔