’امید ہے اہلیہ کے لیے اچھا شوہر ثابت ہوں گا،‘ شاداب خان کی بھی شادی ہوگئی

پاکستان کرکٹ ٹیم کے آل راؤنڈر شاداب خان بھی شادی کے بندھن میں بندھ گئے ہیں۔

جمعرات کے روز سماجی رابطوں کی ویب سائٹ ٹوئٹر پر پاکستانی آل راؤنڈر شاداب خان نے اپنی شادی کا اعلان کیا۔

شاداب خان کی شادی سابق پاکستانی کرکٹر اور کوچ ثقلین مشتاق کی بیٹی سے ہوئی ہے۔

شاداب خان کہتے ہیں کہ ’آج میرے اور میرے خاندان کے لیے ایک مبارک دن ہے۔ میری آج بارات تھی۔ امید کرتا ہوں کہ میں اپنی اہلیہ کے لیے ایک اچھا شوہر ثابت ہوں گا۔‘

شاداب خان کے مطابق انہوں نے اپنی بارات میں جو شیروانی پہن رکھی ہے وہ کراچی کے ڈیزائنر ہمایوں عالمگیر سے بنوائی گئی تھی جبکہ ان کی سٹائلنگ ’ٹونی اینڈ گائے‘ نے کی تھی۔

اس سے پہلے 23 جنوری کو شاداب خان کا نکاح ہوا تھا جس میں ان کی فیملی سمیت قریبی رشتہ داروں نے شرکت کی تھی۔

شاداب خان کے ولیمے کے تقریب 10 فروری کو ہوگی۔

گزشتہ ایک ماہ کے دوران شاداب شادی کا لڈو کھانے والے تیسرے پاکستانی کرکٹر ہیں۔

اس سے قبل بیٹر شان مسعود نے کراچی میں اپنی نئی اننگز کا آغاز کیا تھا جبکہ فاسٹ بولر شاہین شاہ آفریدی کا بھی گزشتہ ہفتے سابق کرکٹر شاہد آفریدی کی بیٹی سے نکاح ہوا تھا۔