امریکہ نے کینیڈا کی فضائی حدود میں پرواز کرتی ’ناقابل شناخت شے‘ کو مار گرایا

امریکی ایف 22 جنگی طیارے نے کینیڈا کی فضائی حدود میں پرواز کرنے والی سلینڈر نما ناقابل شناخت شے کو مار گرایا ہے۔

خبر رساں ادارے روئٹرز کے مطابق کینیڈا کے وزیراعظم جسٹن ٹروڈو نے اعلان کیا کہ ملک کے شمالی علاقے یوکون میں ناقابل شناخت شے کو مار گرایا ہے جس کا ملبہ کینیڈا کی افواج نکالیں گی اور وہی اس کا جائزہ لیں گی۔

خیال رہے کہ دو روز میں امریکی جنگی طیاروں کی ناقابل شناخت شے کو مار گرانے کی یہ دوسری کارروائی ہے۔ 

گزشتہ روز ایف 22 جنگی طیارے نے ریاست الاسکا کی فضائی حدود میں موجود ناقابل شناخت اڑنے والی شے (یو ایف او) کو مار گرایا تھا۔ اس کے متعلق امریکی حکام نے کہا تھا کہ یہ ایک چھوٹی گاڑی کے سائز کے برابر تھی۔

کینیڈا کی وزیر دفاع انیتا انند نے بتایا کہ سلینڈر نما شے 40 ہزار فٹ کی بلندی پر پرواز کر رہی تھی اور فضائی ٹریفک کے لیے خطرے کا باعث تھی۔

دوسری جانب امریکہ محکمہ دفاع پینٹاگون کا کہنا ہے کہ نارتھ امریکن ایروسپیس کمانڈ (این او آر اے ڈی) نے الاسکا کے اوپر اڑتی ہوئی اس شے کا کھوج لگایا تھا۔

پینٹاگون نے کہا امریکی جنگی طیاروں نے کینیڈا کی فضائی حدود میں داخل ہوتی ہوئی اس شے کو مانیٹر کیا جس کے بعد کینیڈا کے سی ایف 18 اور سی پی 140 طیارے بھی کارروائی میں شامل ہوئے۔

پینٹاگون کے ترجمان بریگیڈیئر جنرل پیٹرک رائیڈر نے بیان میں کہا کہ ’امریکہ اور کینیڈا کے حکام کے درمیان کوآرڈینیشن کے بعد امریکی ایف 22 طیارے نے ایم 9ایکس میزائل کے ذریعے کینیڈا کی حدود میں شے کو مار گرایا ہے۔‘

پینٹاگون نے مزید کہا کہ صدر جو بائیڈن اور وزیراعظم جسٹن ٹروڈو کے درمیان ٹیلی فونک رابطے کے بعد امریکی صدر نے اپنی فوج کو اختیار دیا تھا کہ وہ کینیڈا کے ساتھ مل کر ناقابل شناخت شے کو مار گرائیں۔

کینیڈا کے وزیراعظم نے ٹویٹ کیا کہ ’میں نے کینیڈا کی فضائی حدود کی خلاف ورزی کرنے والی ناقابل شناخت شے کو مار گرانے کا حکم دیا ہے۔ (امریکی) این او آر اے ڈی کمانڈ نے یوکان پر اڑنے والی شے کو مار گرایا۔ کینیڈا اور امریکہ کے طیارے حرکت میں لائے گئے تھے اور امریکی ایف 22 نے شے کی جانب کامیاب فائر کیا۔‘

وائٹ ہاؤس کے مطابق جو بائیڈن اور جسٹن ٹروڈو نے ملبہ نکالنے کی اہمیت پر زور دیا ہے تاکہ اس شے کی حقیت کا پتا لگایا جا سکے۔

چند دن قبل چار فروری کو امریکی جنگی طیارے ایف 22 نے ہی ریاست جنوبی کیرولائنا کی فضائی حدود میں اڑنے والے چینی غبارے کو مار گرایا تھا جو مبینہ طور پر جاسوسی کے لیے استعمال کیا جا رہا تھا۔

پینٹاگون کے مطابق چینی غبارے کا ملبہ کافی حد تک حاصل کر لیا گیا ہے جس سے چین کی جاسوسی کی صلاحیتوں کے بارے میں مزید معلومات سامنے آئیں گی۔