’سواد آ گیا‘، آئی پی ایل میں پنجابی اور بھوجپوری کمنٹری

انڈٰین پریمیئر لیگ (آئی پی ایل) کے 16ویں سیزن میں جہاں شائقین کرکٹ دنیا بھر کے کھلاڑیوں کو کھیلتا دیکھ رہے ہیں وہیں اس مرتبہ کی نشریات میں بھی جدت اور نیا انداز دیکھنے میں آ رہا ہے۔

آئی پی ایل کے 16ویں سیزن کے نشریاتی حقوق انڈیا کے سپورٹس چینل سٹار سپورٹس کے ساتھ ساتھ آن لائن سٹریمنگ ایپ جیو سینما کے پاس ہیں۔

یوں تو انڈٰین کرکٹ کی نشریات میں انگلش کے علاوہ ہندی اور جنوبی انڈیا کی زبانوں جیسے تامل، تیلگو اور ملیالم میں کمنٹری کئی برسوں سے ہو رہی ہے تاہم اس مرتبہ جیو سنیما پر شائقینِ کرکٹ دو نئی زبانوں پنجابی اور بھوجپوری میں بھی کمنٹری سن رہے ہیں۔

پنجابی اور بھوجپوری زبانوں میں کمنٹری آئی پی ایل سمیت کسی بھی پروفیشنل کرکٹ میں پہلی مرتبہ متعارف کی گئی ہیں جنہیں عوام کی بڑی تعداد پسند کر رہی ہے۔

جیو سنیما کے پنجابی کمنٹری کے پینل میں سرن دیپ سنگھ، راہُل شرما، وی آر وی سنگھ، ریتندر سنگھ سوڈھی، سنیل تنیجا، آتُل وسان، گرجیت سنگھ اور پلک شرما شامل ہیں۔

دوسری جانب بھوجپوری کمنٹری کے پینل میں محمد سیف، شیوم سنگھ، غلام حسین، ستیا پرکاش اور ساؤربھ ورما سمیت دیگر کئی کمنٹیٹرز موجود ہیں۔

آئی پی ایل کے پہلے میچ میں ہی بھوجپوری اور پنجابی زبان کی کمنٹری نے غیرمعمولی مقبولیت حاصل کی ہے۔

شائقین کرکٹ دونوں زبانوں کی مزیدار اور دلچسپ کمنٹری کے بارے میں سماجی رابطوں کی ویب سائٹ ٹوئٹر پر دلچسپ تبصرے کر رہے ہیں۔

شاومیا پنجابی کمنٹری کا کلپ شیئر کرتے ہوئے کہتے ہیں کہ ’جی ہاں، آئی پی ایل میں پنجابی کمنٹری گولڈ ہے۔‘

ٹوئٹر ہینڈل روفل گاندھی نے جیو سینما کی تعریف کرتے ہوئے کہا کہ ’پنجابی سکور بورڈ اور کبڈی والی مصالحہ دار پنجابی کمنٹری۔ جیو سنیما نے مفت میں اس کا انتظام کر رکھا ہے جو ہاٹ سٹار 1000 روپے میں بھی نہیں دیتا تھا۔‘

کرک انفو کے صحافی عمر فاروق کالسن نے اپنی ٹویٹ میں لکھا کہ ’انڈیا سے ایک دوست نے آئی پی ایل کی پنجابی زبان میں کمنٹری بھیجی ہے، سواد آ گیا سُن کے مترو، تسی چھا گئے او۔‘

ڈوپ جٹ نے پنجابی کمنٹری کے بارے کہا کہ ’بھائی پنجابی کمنٹری بہت پیاری ہے، جب ٹاپلی نے ڈائیو لگائی تو انہوں نے کہا ’مینو لگدا کم زیادہ ودھ گیا۔‘

بھوجپوری کمنٹری کے بارے میں اُجاول سنہا لکھتے ہیں کہ ’بھوجپوری کمنٹری آئی پی ایل میں سب سے بہترین چیز شامل کی گئی ہے۔‘

ابھیشیک اوجھا نے مزاحیہ انداز میں لکھا کہ ’آئی پی ایل کا فائنل تو مئی میں شیڈول ہے لیکن ہمیں پہلے سے ہی فاتح مل گیا ہے اور وہ ہے بھوجپوری کمنٹری۔‘