سپریم کورٹ سے اظہارِ یکجہتی: پی ٹی آئی کی ریلیاں، آئندہ ہفتے سے جلسوں کا اعلان

سابق وزیراعظم عمران خان نے سپریم کورٹ سے اظہار یکجہتی کے لیے نکالی گئی ریلی کی قیادت کے دوران آئندہ ہفتے سے ملک بھر میں جلسوں کا اعلان کیا۔ 

سنیچر کو تحریک انصاف کی جانب سے ملک کی اعلٰی عدلیہ اور چیف جسٹس آف پاکستان کے ساتھ اظہارِ یکجہتی کے لیے لاہور، اسلام آباد، راولپنڈی اور پشاور میں ریلیاں نکالی گئیں۔

لاہور میں سابق وزیراعظم عمران خان کی قیادت میں ریلی زمان پارک سے شروع ہو کر لکشمی چوک پہنچ کر اختتام پذیر ہوئی۔

لکشمی چوک پر پہینچنے سے قبل ریلی کے شرکا سے خطاب کرتے ہوئے عمران خان نے کہا کہ ’اگلے ہفتے سے 14 مئی تک جلسے کروں گا۔‘

انہوں نے کہا جب تک الیکشن نہیں ہوتے سانس نہیں لیں گے۔ ہمارے اوپر قاتلانہ حملے ہوئے کسی کو پرواہ نہیں۔ قوم کا نقصان ہورہا ہے ان کو پرواہ نہیں۔‘

اس سے قبل کارکنوں کے نام اپنے ویڈیو پیغام میں عمران خان نے کہا تھا کہ ’آج آپ جہاں بھی ہیں، آپ کے لیے ضروری ہے آئین، سپریم کورٹ اور چیف جسٹس کے لیے گھر سے باہر نکلیں۔‘

انہوں نے کہا کہ ’آج ایک گھنٹے کے لیے آپ کو ہر صورت میں باہر نکلنا ہے، اگر اس ملک کا آئین ٹوٹ گیا تو ملک ٹوٹ جائے گا، اگر انہوں نے سپریم کورٹ کا فیصلہ نہ مانا تو آئین ختم ہو جائے گا۔‘

چیئرمین تحریک انصاف کا کہنا تھا کہ ’اگر ایسا ہو تو اس ملک کا اور آپ کے بچوں کا کوئی مستقبل نہیں ہے۔‘

پشاور میں عمران خان کی کال پر پی ٹی آئی کے کارکنوں کی ریلی کے شرکاء پیر زکوڑی پل پر جمع ہوئے ہیں۔

یاد رہے کہ گذشتہ روز سابق وزیراعظم عمران خان نے ویڈیو خطاب میں کہا تھا کہ ’حکومت انتخابات پر سپریم کورٹ کا فیصلہ نہیں مان رہی، پوری قوم عدالت عظمیٰ کے ساتھ یکجہتی اور آئین کی سربلندی کے لیے کل باہر نکلے۔‘

انہوں نے کہا کہ ’میں ساری قوم سے اپیل کرتا ہوں کہ یہ فیصلہ کن وقت ہے، آپ کو باہر نکلنا پڑے گا۔‘

عمران خان کا کہنا تھا کہ ’ہم نے سپریم کورٹ سے کہا ہے کہ اگر یہ 14 مئی سے قبل اسمبلیاں نہیں توڑتے تو ہم پنجاب میں الیکشن کا انعقاد چاہیں گے۔‘