فواد چوہدری کی عدالت کی طرف دوڑ، ’پی ڈی ایم حکومت میں آئی ہی سبق سکھانے ہے‘

اسلام آباد ہائی کورٹ نے منگل کو پاکستان تحریک انصاف (پی ٹی آئی) کے رہنما فواد چوہدری کو رہا کرنے کا حکم دیا لیکن ابھی وہ عدالت سے باہر ہی نکلے تھے کہ انہیں پولیس نے دوبارہ گرفتار کرنے کی کوشش کی۔

عدالت کے باہر بننے والی ویڈیوز میں فواد چوہدری کو دوبارہ گرفتاری سے بچنے کے لیے عدالت کے اندر بھاگتے ہوئے دیکھا جا سکتا ہے۔

پی ٹی آئی رہنما کے وکیل کی جانب سے پولیس کے خلاف اسلام آباد ہائی کورٹ میں توہین عدالت کی درخواست دائر کردی گئی ہے۔

فواد چوہدری کی عدالت کی طرف بھاگنے کی ویڈیو منظر عام پر آنے کے بعد سوشل میڈیا پر ایک نئی بحث چھڑ گئی ہے۔

صحافی سمیر مندھرو نے ایک ٹویٹ میں لکھا کہ ’ویسا ماحول پیدا کریں جو کل آپ کے لیے بھی ٹھیک ہو۔ ایسا لگتا ہے کہ پی ڈی ایم حکومت میں آئی ہی بدلہ لینے اور سبق سکھانے ہے۔‘

پاکستان مسلم لیگ (ن) کے سینیٹر افنان اللہ خان نے ایک ٹویٹ میں فواد چوہدری پر طنز کرتے ہوئے لکھا کہ ’لگتا ہے کہ یہ بھی جلد پی ٹی آئی سے لاتعلقی کا اعلان کردیں گے۔‘

فاروق لغاری نے پی ٹی آئی کے رہنماؤں کو یاد دلایا کہ ’میاں محمد نواز شریف صاحب اپنی بیوی کو بسترِ مرگ پر چھوڑ کر بیٹی محترمہ مریم نواز صاحبہ کے ہمراہ جیل کاٹنے آئے تھے۔‘

فواد چوہدری کی ویڈیو پر تبصرہ کرتے ہوئے ایک صارف نے لکھا کہ ’فواد چوہدری کو اولمپکس میں پاکستان کی نمائندگی کرنی چاہیے۔‘

کالم نویس اور تجزیہ کار مشرف زیدی پی ٹی آئی رہنما پر طنز کرنے والوں سے ناراض دکھا ئی دیے۔ انہوں نے ایک ٹویٹ میں لکھا کہ ’جو گرفتاری سے بچنے کی کوشش پر فواد چوہدری کا مذاق اُڑا رہے ہیں شاید وہ یہ بھول گئے ہیں کہ پچھلے سال کیا ہوا تھا۔‘

انہوں نے مزید لکھا کہ ’شہباز گل پر تشدد ہوا۔ اعظم سواتی کو بلیک میل کیا گیا۔ یہ برتاؤ جمہوریت سے میل نہیں کھاتا۔‘