انڈین وزیراعظم آسٹریلیا میں، حامیوں کے لیے ’مودی ایئرویز‘ کی خصوصی پروازیں

انڈیا کے وزیراعظم نریندر مودی کے دورہ آسٹریلیا کے موقع پر انڈین کمیونٹی سے خطاب کے لیے سڈنی اولمپک پارک میں تقریب کا اہتمام کیا گیا ہے جس میں شرکت کے لیے خصوصی پروازیں اور بسیں چلائی گئی ہیں۔

خبر رساں ادارے روئٹرز کے مطابق نریندر مودی کا سال 2014 کے بعد آسٹریلیا کا یہ پہلا سرکاری دورہ ہے جب تقریباً 20 ہزار کی تعداد میں انڈین تارکین سڈنی کے سب سے بڑے سٹیڈیم میں ان کا خیرمقدم کریں گے۔

وزیراعظم نریندر مودی پیر کو تین روزہ دورے پر سڈنی پہنچے ہیں جہاں وہ اعلیٰ عہدیداروں سے ملاقات کے علاوہ آج منگل کو انڈین کمیونٹی سے خطاب بھی کریں گے۔

 تین روزہ دورہ آسٹریلیا کے حوالے سے یہ خیال کیا جا رہا ہے کہ نریندر مودی انڈین کمیونٹی کی جانب سے ملنے والی حمایت کو آئندہ انتخابات کے دوران بھی اپنے حق میں استعمال کر سکتے ہیں، بالخصوص جب حال ہی میں حکومتی جماعت بھارتیا جنتا پارٹی کو اہم ریاست کرناٹک کے انتخابات میں شکست کا سامنا کرنا پڑا ہے۔

آسٹریلیا کے مقامی میڈیا اے بی سی نیوز کے مطابق خصوصی پروازوں اور بسوں کے ذریعے نریندر مودی کے حامیوں کو میلبرن اور کوئینز لینڈ سے سڈنی لایا جا رہا ہے۔

وزیراعظم مودی کے حامیوں کو میلبرن سے سڈنی لانے والی مقامی ایئرلائن کانٹاس کی پرواز کو ’مودی ایئرویز‘ کا نام دیا گیا ہے جبکہ کوئینز لینڈ سے حامیوں کو سڈنی لانے والی خصوصی بسوں کو ’مودی ایکسپریس‘ کے طور پر برانڈ کیا گیا۔

اس سے پہلے بھی دورہ برطانیہ اور امریکہ کے دوران نریندر مودی بڑے مجموں سے خطاب کر چکے ہیں جس سے انڈین تارکین میں ان کی مقبولیت کا اندازہ ہوتا ہے۔

نریندر مودی کی آمد سے پہلے ہی سڈنی کے اولمپک سٹیدیم کے باہر جشن کا آغاز ہو گیا ہے جہاں بڑی تعداد میں انڈین نژاد آسٹریلوی ڈانس، گانوں اور نعروں سے اپنی خوشی کا اظہار کر رہے ہیں۔

اولمپک سٹیدیم میں ہونے والی تقریب میں آسٹریلوی وزیراعظم انتھونی البانیس بھی ممکنہ طور پر نریندر مودی کے ہمراہ شرکت کریں گے۔

بدھ کو دونوں رہنماؤں کے درمیان باقاعدہ ملاقات میں تجارت، سرمایہ کاری، قابل تجدید توانائی، دفاع اور سکیورٹی کے موضوعات پر بات چیت ہوگی۔

وزیراعظم انتھونی البانیس نے جاری بیان میں کہا کہ ’آسٹریلیا اور انڈیا مستحکم، محفوظ اور کامیاب انڈو پیسیفک کے لیے پرعزم ہیں۔‘

خیال رہے کہ انڈیا، آسٹریلیا کا چھٹا بڑا تجارتی پارٹنر ہے۔