ایم پی او کے تحت اسد عمر کی گرفتاری کالعدم قرار، فوری رہا کرنے کا حکم

اسلام آباد ہائی کورٹ نے تحریک انصاف کے رہنما اسد عمر کی ایم پی او کے تحت گرفتاری کالعدم قرار دیتے ہوئے انہیں فوری رہا کرنے کا حکم دے دیا ہے۔

بدھ کو پاکستان تحریک انصاف کے رہنما اور سابق وفاقی وزیر اسد عمر کی مقدمات کی تفصیلات کی فراہمی اور گرفتاری کے خلاف کیس کی سماعت ہوئی۔ پی ٹی آئی کے رہنما اسد عمر کے وکیل بابر اعوان عدالت میں پیش ہوئے۔

دورانِ سماعت جسٹس میاں گل حسن اورنگزیب نے ریمارکس دیے کہ ’جن دو کیسز میں ضمانت مانگ رہے ہیں وہ فیصلہ محفوظ کر رہے ہیں۔‘

یاد رہے کہ پی ٹی آئی کے جنرل سیکریٹری اسد عمر کو 10 مئی کو اسلام آباد ہائیکورٹ سے گرفتار کیا گیا تھا۔

پی ٹی آئی رہنما اسد عمر اور شاہ محمود قریشی اسلام آباد ہائی کورٹ میں ایک درخواست لے کر آئے تھے جس میں انہوں نے استدعا کی تھی کہ انہیں عمران خان سے ملنے نہیں دیا جا رہا۔