دبئی آنے والے مغربی سیاحوں کی تعداد میں اضافہ، چار ماہ میں 60 لاکھ کی آمد

متحدہ عرب امارات میں دبئی کی سیاحت کے حوالے سے جاری اعداد و شمار کے مطابق ’رواں سال کے ابتدائی چار ماہ میں 13 لاکھ سے زائد مغربی یورپ سے سیاحوں نے دبئی کا رخ کیا۔‘ 

امارات الیوم اخبار کے مطابق جنوری 2023 سے اپریل تک دبئی میں آنے والے سیاحوں میں سب سے زیادہ تعداد مغربی یورپ سے آنے والوں کی تھی جن کا تناسب مجموعی طور پر 22 فیصد رہا۔ 

گزشتہ چار ماہ کے دوران مجموعی طور پر دبئی آنے والے سیاحوں کی تعداد 60 لاکھ سے زیادہ رہی۔

مغربی یورپی سیاحوں کے بعد دوسرے نمبر پر جرمنی سے آنے والے سیاح تھے جن کی تعداد 2 لاکھ 69 ہزار رہی جبکہ تیسرے نمبر پرفرانس رہا جہاں سے سیاحت کے لیے ایک لاکھ 35 ہزار افراد دبئی پہنچے۔ 

اٹلی سے دبئی آنے والے سیاحوں کی تعداد ایک لاکھ چار ہزار تھی جس کے ساتھ اٹلی سے دبئی کی سیاحت کا نمبر چوتھا رہا۔ 

سروے رپورٹ میں مزید کہا گیا ہے کہ ’اس سال جنوری سے اپریل کے درمیانی عرصے میں آٹھ ممالک سے سیاح دبئی آئے جن کی تعداد کورونا وبا سے قبل یعنی 2019 سے تجاوز کرگئی ہے۔‘

جن آٹھ ممالک سے سیاحوں نے دبئی کا رخ کیا ان میں امریکہ، کینیڈا، جرمنی، روس، عراق، قازقستان، انڈیا اورایران شامل تھے۔ 

رواں برس کے ابتدائی چار ماہ میں جنوبی ایشیا سے 963 ہزار سیاح متحدہ عرب امارات آئے۔

جی سی سی ممالک سے 842 ہزار جبکہ مشرق وسطی اورشمالی افریقہ سے 7 لاکھ 82 ہزار سیاح امارات آئے ہیں۔