سابق پرنسپل سیکریٹری اعظم خان ’لاپتہ‘، تھانہ کوہسار میں مقدمہ درج

سابق وزیراعظم عمران خان کے  پرنسپل سیکرٹری اعظم خان مبینہ طور پر لاپتہ ہو گئے ہیں اور اُن کی گمشدگی کا مقدمہ تھانہ کوہسار میں درج کر لیا گیا ہے۔

جمعے کو اعظم خان کے اہل خانہ نے تھانہ کوہسار میں اُن کی گمشدگی کی درخواست جمع کرائی ہے جس میں کہا گیا ہے کہ ’اعظم خان گذشتہ شام کو گھر سے نکلنے کے بعد واپس نہیں آئے، ان کا موبائل نمبر بھی بند ہے۔‘

پولیس حکام کا کہنا ہے کہ مقدمہ اغوا کی دفعہ 365 کے تحت درج کیا گیا ہے۔

سابق وزیراعظم عمران خان نے اپنی ٹویٹ میں اعظم خان کی گمشدگی کے حوالے سے بتاتے ہوئے لکھا ہے کہ ’اعظم خان جو میرے پرنسپل سیکریٹری تھے گذشتہ شام سے لاپتہ ہیں۔ جو بھی میرے قریب سمجھا جاتا ہے اسے نشانہ بنایا جاتا ہے۔‘

اعظم خان کون ہیں؟

اعظم خان سابق وزیراعظم عمران خان کے پرنسپل سیکریٹری رہے ہیں اور وہ پاکستان ایڈمنسڑیٹیو سروس گروپ کے افسر ہیں۔ ضلع مردان کے علاقے رستم میں پیدا ہونے والے اعظم خان کا تعلق ایک بڑے زمیندار گھرانے سے ہے۔

انہوں نے برن ہال کالج ایبٹ آباد سے تعلیم حاصل کی اور سول سروس کے امتحان میں ٹاپ پوزیشن حاصل کرنے کے بعد متعدد اہم پوزیشنز پر تعینات رہے۔ اپنی سروس کا زیادہ تر عرصہ اعظم خان نے صوبہ خیبر پختونخوا میں گزارا۔ وہ شمالی اور جنوبی وزیرستان میں پولیٹکل ایجنٹ بھی رہے اور پشاور کے کمشنر کے طور پر بھی خدمات سرانجام دیں۔

صوبے کے مختلف محکموں میں جوائنٹ سیکریٹری، ایڈیشنل سیکریٹری کے طور پر کام کرنے کے بعد پاکستان تحریک انصاف کے پچھلے دور حکومت میں اعظم خان صوبائی چیف سیکرٹری کے عہدے تک پہنچے جہاں صوبائی حکومت کے اہم اجلاسوں میں شرکت کرنے والے پارٹی چیئرمین عمران خان کی نظر انتخاب ان پر ٹھہری۔

2018 کے انتخابات میں وزیراعظم بننے کے فوراً بعد عمران خان نے کئی دوسرے سینیئر افسران کی موجودگی کے باوجود اعظم خان کو اپنا پرنسپل سیکرٹری تعینات کیا جو پاکستان میں بیوروکریسی کا سب سے اہم عہدہ سمجھا جاتا ہے۔ 

قانونی کارروائی عمل میں لائی جائے گی: ترجمان اسلام آباد پولیس

اسلام آباد پولیس کے ترجمان کا کہنا ہے کہ ’اعظم خان کی گمشدگی کے حوالے  سے قانونی کارروائی عمل میں لائی جائے گی۔‘

جمعے کو ٹوئٹر پر ایک بیان میں ترجمان نے کہا کہ ’درخواست دہندہ متعلقہ تھانے سے رابطہ کرے تاکہ قانونی کارروائی کی جا سکے۔‘

ترجمان اسلام آباد پولیس کا مزید کہنا ہے کہ ’اعظم خان کے حوالے سے کسی کے پاس کوئی بھی اطلاع ہو تو پکار 15 پر اطلاع دیں۔‘