مکہ مکرمہ : گودام میں آتشزدگی ، دو افراد ہلاک 6 زخمی
جمعرات 6 جولائی 2023 9:49
آتشزدگی کا واقعہ حجاج کوخدمات فراہم کرنے والی کمپنی کے گودام میں پیش آیا (فوٹو، ٹوئٹر)
مکہ مکرمہ میں حجاج کو مختلف خدمات فراہم کرنے والی کمپنی کے گودام میں آتشزدگی سے دو افراد ہلاک جبکہ 6 زخمی ہوگئے۔
سبق نیوز نے غیرعرب افریقی ممالک کے حجاج کوخدمات فراہم کرنے والی کمپنی کی انتظامیہ کے حوالے سے واقعے کی تفصیلات بتاتے ہوئے مزید کہا کہ آتشزدگی کا واقعہ گزشتہ پیرکو پیش آیا تھا ۔ گودام میدان عرفات کے مشرقی جانب واقع ہے جہاں بعداز حج وہ سامان اسٹورکیا گیا تھا جو حج کے دوران مشاعر مقدسہ کے خیموں میں فراہم کیا جاتا ہے۔
کمپنی کے ذمہ دار کا مزید کہنا تھا کہ کمپنی کے 2 کارکن ہلاک جبکہ 6 زخمی ہوگئے۔ جنہیں ہلال الاحمر کی ایمبولینسوں کے ذریعے فوری طورپرہسپتال میں منتقل کیا گیا۔
کمپنی کی جانب سے اس امرکی یقین دہانی کرائی گئی ہے کہ وہ آتشزدگی کے نتیجے میں ہلاک ہونے والوں کے لواحقین اورزخمیوں کی بھرپورمعاونت کی جائے گی۔
