شہباز شریف سے سعودی نائب وزیر کی ملاقات، معدنیات کے شعبے میں سرکایہ کاری میں دلچسپی کا اظہار

وزیرِاعظم شہباز شریف سے سعودی عرب کے نائب وزیر برائے کان کنی، صنعت و معدنیات خالد بن صالح المدفر کی سعودی وفد کے ہمراہ ملاقات   کی ہے۔

وزیراعظم ہاؤس سے جاری بیان کے مطابق شہباز شریف نے کہا کہ ہر مشکل وقت میں پاکستان کی مدد پر سعودی حکومت اور عوام کا شکریہ ادا کرتے ہیں۔

دوران مللاقات وزیرِ اعظم نے سعودی وزیر کو کہا کہ پاکستان آپکا دوسرا گھر ہے۔

وزیراعظم نے کہا کہ پوری پاکستانی قوم سعودی فرمانروا شاہ سلمان اور ولی عہد شہزادہ محمد بن سلمان کی پاکستان کے مشکل وقت میں مدد پر مشکور ہے۔

شہباز شریف نے کہا کہ پاکستان میں سرمایہ کاری کے وسیع مواقع موجود ہیں۔

’پاکستان میں سرمایہ کاری کرنے والوں کو نہ صرف نگران حکومت بلکہ آئندہ منتخب حکومت بھی سہولت فراہم کرے گی۔‘

وزیراعظم نے کہا کہ ملک میں بیرونی سرمایہ کاروں کی سہولت کے لیے خصوصی سرمایہ کاری سہولت کونسل (SIFC)  کا قیام عمل میں لایا گیا ہے۔

’سرمایہ کاری سہولت کونسل پاکستان میں بیرونی سرمایہ کاری منصوبوں کی فوری و بلاتعطل تکمیل یقینی بنائے گی۔‘

وزیراعظم کا مزید کہنا تھا کہ پاکستان میں معدنیات کے شعبے میں سرمایہ کاری کے بہترین مواقع موجود ہیں۔

’حکومت کا 10 ہزار میگاواٹ شمسی بجلی کا منصوبہ بھی بیرونی سرمایہ کاروں کیلئے بہترین موقع ہے۔‘

سعودی وزیر نے کہا کہ پاکستان میں سرمایہ کاری سہولت کونسل کا قیام پاکستان میں بیرونی سرمایہ کاروں کے لیے ایک مثبت اور اہم پیغام ہے۔

’سعودی عرب پاکستان کے شعبہ معدنیات میں موجود وسیع مواقع میں سرمایہ کاری میں گہری دلچسپی رکھتا ہے۔‘

ملاقات میں وفاقی وزرا  مخدوم مرتضی محمود، خرم دستگیر، وزیرِ مملکت برائے پیٹرولیم مصدق ملک، معاون خصوصی تسنیم احمد قریشی اور متعلقہ اعلی حکام نے شرکت کی۔

سعودی وفد میں سعودی عرب کے پاکستان میں سفیر نواف بن سعید المالکی، عبداللہ موفتر الشمرانی چیئرمین سعودی جیولاجیکل سروے، عبدالرحمن خالد البیلوشی نائب وزیر برائے کان کنی صنعت اور اعلی سعودی حکام شام تھے۔