تحریک انصاف کے کارکن حسان خان نیازی کی ایبٹ آباد سے گرفتاری کی اطلاعات

تحریک انصاف کے کارکن حسان خان نیازی کے والد حفیظ اللہ نیازی نے دعویٰ کیا ہے کہ ان کے بیٹے کو ایبٹ آباد سے گرفتار کر لیا گیا ہے۔

ٹوئٹر پر اپنے پیغام میں حفیظ اللہ نیازی نے دعویٰ کیا کہ ’میرا بیٹا حسان خان ایبٹ آباد سے گرفتار کر لیا گیا ہے، مجھے امید ہے قانونی تقاضے پورے کیے جائیں گے اور قانون سے تجاوز نہیں کیا جائے گا۔

تحریک انصاف کے رہنما فرخ حبیب نے بھی حسان نیازی کی گرفتاری کی تصدیق کرتے ہوئے کہا ہے کہ ’بیریسٹر حسان نیازی کو ایبٹ آباد سے کچھ دیر قبل گرفتار کرلیا گیا ہے۔ انہیں قانون کے مطابق عدالت پیش کیا جائے تاکہ یہ اپنا قانونی حق دفاع استعمال کر سکے اور خاندان کو ان کے متعلق رسائی فراہم کی جائے۔‘

حسان نیازی پر نو مئی کو جناح ہاؤس حملے میں ملوث ہونے کا الزام عائد کیا گیا تھا۔