سعودی عرب اور یونیسکو میں عالمی ورثے کے تحفظ کے لیے تعاون کا جائزہ

سعودی وزیر ثقافت شہزادہ بدر بن عبداللہ بن فرحان نے پیر کو ریاض میں یونیسکو کے ماتحت بین الاقوامی ورثہ کمیٹی  کے 45 ویں توسیعی سیشن کا افتتاح کیا ہے۔

سرکاری خبررساں ادارے ایس پی اے کے مطابق شہزادہ بدر بن فرحان نے اس موقع پر کہا کہ ’سعودی عرب ورثے کی اہمیت کو تسلیم کرتا ہے۔ یہ تمدنی خزانہ انسانی میراث اور معلومات کا خزانہ ہے‘۔ 

سعودی وزیر ثقافت کا کہنا تھا کہ’ سعودی عرب یونیسکو میں بین الاقوامی تاریخی مقامات کے تحفظ اور آثار قدیمہ کے شعبے میں انسانی استعداد کے استحکام کے لیے جاری کردہ فیصلوں کے نفاذ کے لیے کوشاں ہے‘۔ 

’ سعودی عرب ورثے پر کام کرنے والوں کی استعداد بڑھانے کے لیے دس سالہ پروگرام پر عمل پیرا ہے‘۔

شہزادہ بدر بن فرحان نے مزید کہا’سعودی عرب بین الاقوامی ورثے کے توسیعی سیشن کی میزبانی کررہا ہے۔ چاہتے ہیں کہ تمام شرکا دنیا بھر میں عالمی تاریخی مقامات کے تحفظ کے سلسلے میں مل کر اپنا کردار ادا کریں۔ سٹراٹیجک شراکت کے نئے روٹس بنانے میں تعاون دیں اور مشترکہ تصور کی تشکیل میں حصہ لیں‘۔ 

انہوں نے کہا ’یونیسکو سمیت تمام بین الاقوامی مراکز دنیا بھر میں قدرتی اور ثقافتی ورثے کے تحفظ کے سلسلے میں قابل قدر کوششیں کررہے ہیں‘۔ 

اس موقع پر ریاض میں المربع تاریخی محل نے متعدد پروگراموں کا اہتمام کیا۔ جن میں یونیسکو کے ڈائریکٹر جنرل سمیت متعدد تنظیموں کے عہدیداران، شریک وفود کے سربراہ، ماہرین، سکالرز شریک ہوئے۔ 

علاوہ ازیں  سعودی وزیر ثقافت سے اتوار کو ریاض میں یونیسکو کی ڈائریکٹر جنرل نے ملاقات کی۔

وہ یونیسکو کے ماتحت عالمی ورثہ کمیٹی کے 45 ویں توسیعی سیشن میں شرکت کے لیے سعودی عرب کے دورے پر ہیں۔

ملاقات میں سعودی عرب اوریونیسکو کے درمیان عالمی ورثے کے تحفظ کے سلسلے میں تعاون کا جائزہ لیا۔

وزیر ثقافت نے یقین دلایا کہ سعودی عرب چھوٹے جزائر پر مشتمل ترقی پذیر ممالک میں یونیسکو کی سرگرمیوں کا حامی ہے۔

انہوں نے ثقافت اور ورثے کے تحفظ کے حوالے سے یونیسکو میں قائم سعودی فنڈ منصوبوں پر بھی تبادلہ خیال کیا۔