’کوئی فرد یا پارٹی مقصد سے بڑی نہیں،‘ پی ٹی آئی رہنما عندلیب عباس آئی پی پی میں شامل

عندلیب عباس سمیت تین خواتین رہنما پاکستان تحریک انصاف (پی ٹی آئی) کو خیرباد کہہ کر جہانگیر ترین کی استحکام پاکستان پارٹی میں شامل ہوگئی ہیں۔

منگل کو استحکامِ پاکستان پارٹی میں شامل ہونے والوں میں پی ٹی آئی کی دو سابق اراکین پنجاب اسمبلی سعدیہ سہیل اور سمیرا بخاری بھی شامل ہیں۔

لاہور میں استحکامِ پاکستان پارٹی کی سیکریٹری اطلاعات فردوش عاشق اعوان کے ہمراہ پریس کانفرنس کرتے ہوئے عندلیب عباس کا کہنا تھا کہ ’ہمیں آگے دیکھنا ہے، یہ دیکھنا ہے کہ مقصد کیا ہے۔ کوئی فرد یا پارٹی مقصد سے بڑا نہیں ہوتا۔‘

پی ٹی آئی نے استحکامِ پاکستان پارٹی میں شامل ہونے والے افراد کو ’اشاروں پر ناچنے والی کٹھ پُتلیاں‘ قرار دیا ہے۔

پی ٹی آئی کے ترجمان کا ایک بیان میں کہنا تھا کہ ’سیاسی جماعت عوام کی تائید و شرکت سے وجود میں آتی ہیں اور عوامی قبولیت ہی سے پروان چڑھتی ہیں۔‘

پی ٹی آئی چھوڑنے والے افراد کا حوالہ دیتے ہوئے جماعت کے ترجمان کا کہنا تھا کہ ’ہمت، جرات اور باطل کے سامنے ثابت قدم رہنے والے کارکنان ہی تحریک انصاف کا سرمایہ اور مستقبل کی قیادت کے حقدار ہیں۔‘

اس سے قبل 16 اکتوبر کو پی ٹی آئی کے ایک اور رہنما فرخ حبیب نے سیاسی وابستگی بدلتے ہوئے استحکامِ پاکستان پارٹی میں شمولیت اختیار کرلی تھی۔

فرخ حبیب نو مئی کے مظاہروں کے بعد روپوش تھے اور پی ٹی آئی کے حامی افراد کا دعویٰ تھا کہ وہ جبری طور پر لاپتہ کیے گئے ہیں۔

انہوں نے کہا تھا کہ ’ہم لوگ نو مئی کے افسوس ناک واقعات کے بعد گھروں سے دور تھے۔ ہم تو تحریک انصاف میں قائداعظم کا پاکستان بنانے کے لیے شامل ہوئے تھے۔ لیکن میں حالات کے تسلسل اور جذبات میں بہت آگے نکل گیا تھا۔‘

انہوں نے کہا تھا کہ ’عمران خان صاحب کی ذمہ داری تھی کہ وہ نو مئی کے واقعات کے بعد تدبر اور ذمہ داری کا مظاہرہ کرتے۔ وہ چاہتے تھے کہ لوگ ان کے لیے باہر لڑیں۔ آپ کے پاس یہ راستہ تھا کہ آپ قانون کا سامنا کرتے۔‘