توانائی کے شعبے میں سعودی عرب کی سرمایہ کاری کا خیر مقدم کرتے ہیں، نگران وزیراعظم سے سعودی الجمیع گروپ کے وفد کی ملاقات

سعودی عرب کے الجمیح گروپ کے سربراہ شیخ عبد العزیز کی قیادت میں چار رکنی وفد نے پاکستان کے نگراں وزیراعظم انوار الحق کاکڑ سے ملاقات کی ہے۔

وزیراعظم ہاؤس کے بیان کے مطابق اس موقعے پر نگراں وزیراعظم انوار الحق کاکڑ نے کہا کہ ’پاکستان اور سعودی عرب کے درمیان دیرینہ برادرانہ تعلقات ہیں جو وقت کے ساتھ مزید مضبوط ہو رہے ہیں۔‘

انہوں نے کہا کہ ’پاکستان میں سعودی سرمایہ کاری کو قدر کی نگاہ سے دیکھتے ہیں۔ پاکستان کے توانائی کے شعبے میں سعودی سرمایہ کاری کا خیر مقدم کرتے ہیں۔‘ بیان کے مطابق الجمیح گروپ نے کراچی الیکٹرک میں بڑے پیمانے پر سرمایہ کاری کی ہے۔

اس ملاقات میں وزیراعظم نے مزید کہا کہ ’کراچی الیکٹرک کی جانب سے متبادل توانائی کے شعبے میں سرمایہ کاری کی حکمت عملی خوش آئند ہے جس سے صارفین کے لیے بجلی کا ٹیرف کم کرنے میں مدد ملے گی۔

وزیراعظم ہاؤس کے مطابق ’الجمیح گروپ کے وفد نے کراچی الیکٹرک کے دیرینہ مسائل حل کرنے پر وزیراعظم اور حکومتی ٹیم کا شکریہ ادا کیا اور انہیں 1500 میگاواٹ کے سرمایہ کاری کے نئے منصوبوں کے حوالے سے آگاہ کیا۔ ان منصوبوں میں مقامی ذرائع اور قابل تجدید توانائی پر انحصار کیا جائے گا۔‘

ملاقات میں نگراں وفاقی وزیر خزانہ ڈاکٹر شمشاد اختر اور نگراں وفاقی وزیر توانائی محمد علی اور دیگر اعلیٰ سرکاری افسران بھی موجود تھے۔