سادہ اکثریت پر وزیراعظم نواز شریف، نہ ملے تو فیصلہ مشاورت سے ہوگا: شہباز شریف

سابق وزیراعظم اور پاکستان مسلم لیگ ن کے صدر شہباز شریف نے کہا ہے کہ عام انتخابات میں اگر سادہ اکثریت ملتی ہے تو ہمارے وزیراعظم کے امیدوار نواز شریف ہوں گے۔

 جیو نیوز سے گفتگو کرتے ہوئے شہباز شریف نے کہا کہ پاکستانی عوام کی قربانیوں سے دہشت گردی کا تقریباً خاتمہ ہوگیا تھا، لیکن تین سال قبل بعض ایسے فیصلے ہوئے جس سے دہشت گردوں کو سر اٹھانے کا دوبارہ موقع ملا۔

انہوں نے کہا کہ اللہ کا کرم ہے ہم نے پاکستان کو ڈیفالٹ ہونے سے بچایا، کل عوام اس بات کا فیصلہ کریں گے کہ کون سی پارٹی ملک میں حکومت بنائے گی۔

مسلم لیگ ن کے صدر کا کہنا تھا کہ ہمیں آئی ایم ایف کے ایک اور پروگرام کی طرف جانا ہوگا۔

’ہمیں بڑے فیصلے کرنے ہوں گے، ایسے اثاثوں کو بیچنا چاہیے جو نقصان کر رہے ہیں۔‘

ایک سوال پر شہباز شریف نے کہا کہ ’انتخابات میں اگر سادہ اکثریت ملتی ہے تو ہمارے وزیراعظم کے امیدوار نوازشریف ہی ہوں گے، البتہ اگر سادہ اکثریت نہیں ملی تو وزارت عظمیٰ کا فیصلہ مشاورت سے ہوگا۔‘

انہوں نے مزید کہا کہ الیکشن میں چند گھنٹے باقی رہ گئے ہیں، ملک میں ہونے والے دھماکوں کا مقصد ہے کہ ووٹرز کو ڈرایا جائے تا کہ وہ ووٹ ڈالنے نہ آئیں۔

شہباز شریف نے کہا کہ  نوازشریف کی بیماری سیریس تھی، ان کی بیماری پر اس وقت کی حکومت نے میڈیکل بورڈ بنایا تھا۔