ابہا کی ’سموسہ مارکیٹ‘ میں افطار کی خریداری اور تفریحی سرگرمیاں ساتھ ساتھ

سعودی عرب کے عسیر ریجن کے شہر ابہا کے رہائشی رمضان میں افطار کی خریداری کے لیے ’سموسہ مارکیٹ‘ (سوق السمبوسہ) کا رخ کرتے ہیں۔  یہ رمضان میں خریداری کے ساتھ  تفریحی سرگرمیوں کا بھی اہم ذریعہ ہے۔

سموسہ مارکیٹ کافی پرانی اور معروف ہے۔ یہاں لوگ احباب سے ملاقات اور خریداری کے لیے خاص طور پر آتے ہیں۔ یہ مارکیٹ جتنی شہریوں میں مقبول ہے اتنی ہی غیرملکیوں میں بھی معروف ہے۔

مارکیٹ میں روزانہ عصر کے بعد چہل پہل شروع ہوجاتی ہے اور یہ رونق افطار تک رہتی ہے۔ ان دنوں ابہا کا موسم بہترین ہے اور اطراف میں رہنے والے بھی یہاں سے افطار کے لیے اپنی پسند کی اشیا خرید تے ہیں۔

ابھا کے المشھد محلے میں واقع یہ مارکیٹ تقریبا 19 سال قبل قائم ہوئی تھی۔ شہریوں اور مقیم غیرملکیوں کےلیے رمضان شاپنگ کے ساتھ ایک تفریح گاہ بھی ہے۔ 

سموسہ مارکیٹ میں اب بے شمار سٹالز لگتے ہیں۔ دکاندار سعودی ہیں جن میں مرد وخواتین دونوں ہیں۔ یہاں پھل، افطارکے لوازمات اور دیگر گھریلو اشیا کے بھی سٹالز لگتے ہیں۔

مختلف تلی ہوئی اشیا، مختلف پکوان، سینڈوچز اور دیگر لوازمات سے سٹالز بھرے ہوتے ہیں جن  میں گوشت سے تیار کردہ اشیا،، تنور میں تیار ہونے والی مختلف قسم کی روٹیاں، میتھی سے تیار کردہ ڈش، سلاد، موسمی پھل کے علاوہ تازہ سبزیاں شامل ہیں۔

بچوں کے لیے بھی یہاں تفریح کا سامان موجود ہے اس لیے بچے بھی والدین کے ہمراہ آنا پسند کرتے ہیں۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں