سعودی ولی عہد کی ای سپورٹس ورلڈ کپ کی اختتامی تقریب میں شرکت

سعودی ولی عہد شہزادہ محمد بن سلمان نے اتوار کو ریاض میں ای سپورٹس ورلڈ کپ کی چیمپیئن فالکنز ٹیم کو ٹرافی دی ہے۔

ایس پی اے کے مطابق ولی عہد نے ای سپورٹس ورلڈ کپ کی اختتامی تقریب میں شرکت کی۔

 سعودی ولی عہد تقریب میں پہنچے تو فیفا کے صدر گیانی انفینٹینو نے ان کا خیرمقدم کیا۔ اس موقع پر شاہی ترانہ بجایا گیا۔

ای سپورٹس ورلڈ کپ کا پہلا ایڈیشن سعودی دارالحکومت ریاض میں 3 جولائی سے 25 اگست تک آٹھ ہفتے تک جاری رہا۔

 پہلے ایڈیشن میں 22 عالمی چیمپیئن شپ ہوئیں۔ ڈیڑھ ہزار سے زیادہ پروفیشنلز پلیئرز نے تقریبا 500 ایلیٹ انٹرنیشنل ٹیمیں تشکیل دیں۔

سعودی فالکنز نے 5 ہزار 665 پوائنٹس سکور کرکے ٹائٹل حاصل کیا۔ ڈچ ٹیم 2 ہزار 545 پوائنٹس کے ساتھ دوسرے جبکہ سوئس ٹیم 2 ہزار پوائنٹس کے ساتھ تیسرے نمبر پر رہی۔

ٹیموں نے تین ملین ڈالر کے انعامات کے لیے مقابلہ کیا۔

یاد رہے کہ سعودی عرب میں گیمنگ کے شوقین تقریبا 28.3 ملین ہیں جو آبادی کا 70 فیصد ہیں۔

 سعودی عرب میں گیمنگ اور ای سپورٹس انڈسٹری تیزی سے ترقی کر رہی ہے جس میں ملکی گیم ڈویلپرز اور خطے میں عالمی سطح کے مقابلوں کی حوصلہ افزائی کے لیے بڑی سرمایہ کاری کی جا رہی ہے۔

سعودی پبلک انویسٹمنٹ فنڈ کی ملکیت والے گروپ نے مملکت کو عالمی معیار کی گیمنگ کمپنیوں کے ساتھ عالمی گیمنگ ہب میں تبدیل کرنے کے لیے 142 بلین ریال کی سرمایہ کاری کررہی ہے۔